Nga Dashnim HEBIBI
Me afrimin e sezonit veror, mijëra bashkatdhetarë nga mërgata shqiptare po bëjnë planet për pushimet e tyre. Për shumë prej tyre, destinacioni mbetet i njëjtë – bregdeti i Shqipërisë, që prej vitesh vazhdon të jetë zgjedhja e preferuar për pushime verore.
Nga veriu në jug, vija bregdetare shqiptare ofron plazhe me ujëra të kristalta, peizazhe mbresëlënëse dhe një natyrë që të fton të rikthehesh. Krahas bukurive natyrore, vizitorët i presin gastronomia e pasur me prodhime të freskëta deti, kuzhina tradicionale shqiptare dhe mikpritja e njohur e banorëve vendas. Riviera Shqiptare, me destinacione si Himara, Dhërmiu, Jala, Ksamili dhe shumë zona të tjera turistike, vazhdon të tërheqë jo vetëm shqiptarët nga diaspora, por edhe një numër gjithnjë e më të madh turistësh nga e gjithë bota. Për mërgimtarët, pushimet në Shqipëri nuk janë vetëm një mundësi për t’u çlodhur pranë detit, por edhe për t’u rikthyer pranë familjes, miqve dhe rrënjëve të tyre.
Nëse ende nuk e keni vendosur destinacionin e pushimeve, përgjigjja për shumëkënd mbetet e thjeshtë: Nuk ka si Shqipëria.
Foto: Dea Hebibi – Himarë, Shqipëri.
