Ministri për Evropën dhe Punët e Jashtme, Igli Hasani, gjatë pjesëmarrjes së tij në Forumin e Dubrovnikut 2025, përcolli një mesazh të qartë: Ballkani Perëndimor nuk mund të trajtohet më si periferia e kontinentit, por është një pjesë thelbësore e së ardhmes strategjike të Evropës.
Në prani të përfaqësuesve të lartë nga rajoni, Evropa dhe më gjerë – përfshirë SHBA-në, Gjirin, Brazilin dhe Afrikën – ministri Hasani theksoi se në kohë pasigurie dhe rivalitetesh gjeopolitike, besimi, transparenca dhe transformimi nuk janë zgjedhje, por domosdoshmëri.
“Shqipëria nuk është një konsumatore e sigurisë, është kontribuese. Nuk presim, po ecim përpara,” theksoi Hasani, duke nënvizuar rolin aktiv të vendit në ruajtjen e stabilitetit rajonal.
Ministri shtjelloi më tej përparimin e Shqipërisë në rrugën drejt Bashkimit Evropian, duke vënë në dukje se vendi ka hapur tashmë katër grup-kapituj negociues, përfshirë kapitujt themelorë dhe tregun e brendshëm. Ai ritheksoi se rruga drejt BE-së është strategjike, e pakthyeshme dhe e mbështetur në reforma të qëndrueshme.
Gjatë fjalës së tij, Hasani paralajmëroi se vonesat në procesin e zgjerimit krijojnë boshllëqe që shfrytëzohen lehtësisht nga aktorë autoritarë. Në këtë kontekst, ai mirëpriti Planin e Rritjes për Ballkanin Perëndimor si një mundësi konkrete për të përshpejtuar integrimin.
“Evropa nuk do të jetë e plotë pa Ballkanin Perëndimor. Dhe Ballkani Perëndimor nuk do të jetë i plotë pa një vend të denjë në familjen evropiane,” përfundoi ministri Hasani, duke theksuar rëndësinë reciproke të integrimit, transmeton rtsh.
