Punonjësit kundërshtojnë planin e kompanisë për kalimin në modelin e punës së pavarur. Grevistët kërkojnë ndalimin e largimeve nga puna dhe ruajtjen e kontratave të përhershme.
Korrierët e kompanisë së shpërndarjes së ushqimit Just Eat në Cyrih dhe në rajonin e Glattalit kanë hyrë në grevë, në shenjë proteste ndaj planit të kompanisë për ndryshimin e modelit të punësimit. Sipas punonjësve, rreth 500 vende pune janë në rrezik si pasojë e këtij vendimi. Greva u zhvillua të dielën, nga ora 11:00 deri në 22:00. Sipas raportimeve të gazetës zvicerane Blick, rreth gjysma e korrierëve që duhej të ishin në turn refuzuan të kryenin dërgesat. Grevistët u mblodhën para restorantit McDonald’s në Stauffacher të Cyrihut, ndërsa sindikata Syndicom bëri të ditur për televizionin SRF se më shumë se gjysma e turneve të drekës dhe të mbrëmjes u anuluan. Pavarësisht grevës, klientët mund të vazhdonin të bënin porosi, por koha e pritjes për dërgesat ishte më e gjatë.
Ndryshimi i modelit të punësimit shqetëson korrierët
Në muajin tetor, Just Eat njoftoi se nga viti i ardhshëm do të kalojë në një të ashtuquajturin “model platforme”. Ky ndryshim prek korrierët në Cyrih, Bernë, Bazel dhe Vinterthur, të cilët nuk do të jenë më punonjës të drejtpërdrejtë të kompanisë.
Në vend të kontratave të rregullta të punës, ata pritet të punojnë si të vetëpunësuar dhe të paguhen për çdo porosi të kryer, një model i ngjashëm me atë që përdor Uber Eats.
Kompania e justifikon këtë vendim me ndryshimin e zakoneve të konsumatorëve, të cilët porosisin ushqim në orare gjithnjë e më të ndryshme, gjatë gjithë ditës dhe natës. Sipas Just Eat, sistemi aktual i punësimit me turne të planifikuara dy javë përpara nuk ofron fleksibilitetin e nevojshëm për t’iu përgjigjur kërkesës.
Ndërkohë, korrierët në Zvicrën perëndimore nuk do të preken nga ky ndryshim, pasi vazhdojnë të jenë të punësuar në bazë të një vendimi gjyqësor.
Sindikata paralajmëron për humbjen e të drejtave sociale
Punonjësit kundërshtojnë modelin e ri, pasi sipas tyre ai ua kalon korrierëve përgjegjësitë dhe rreziqet financiare të aktivitetit. Ata shprehin shqetësimin se do të humbasin mbrojtjen që u garanton punësimi i rregullt, përfshirë sigurimet shoqërore dhe përfitimet që lidhen me kontratën e punës.
Sindikata Syndicom e konsideron këtë zhvillim një rrezik për përhapjen e të ashtuquajturës “punë e pavarur fiktive” (Scheinselbständigkeit), një praktikë ku punonjësit klasifikohen si të vetëpunësuar, megjithëse marrëdhënia e tyre reale e punës mund të ketë karakteristikat e një punësimi të zakonshëm.
Kërkohet ndalimi i largimeve dhe vazhdimi i negociatave
Kërkesat kryesore të korrierëve janë të qarta: ndalimi i largimeve nga puna, ruajtja e kontratave të përhershme dhe zgjatja e procesit të konsultimit deri më 30 nëntor.
“Po bëjmë grevë, sepse duam të negociojmë”, deklaroi një përfaqësues i Syndicom për SRF.
Sipas sindikatës, deri në momentin e raportimit, asnjë përfaqësues i Just Eat nuk kishte kontaktuar punonjësit për të diskutuar kërkesat e tyre. Edhe gazeta Blick bëri të ditur se kompania nuk iu përgjigj kërkesës së saj për koment deri të dielën në mbrëmje.
Greva u vendos të enjten, pasi protesta e zhvilluar në tetor nuk solli rezultatet e pritura nga punonjësit.
Mundësi për zgjerimin e protestave
Për momentin, mbetet e paqartë nëse protestat do të përhapen edhe në qytete të tjera të Zvicrës. Megjithatë, sipas SRF-së, punonjës të pikave të tjera të shpërndarjes kanë shprehur gatishmërinë për t’iu bashkuar aksionit të kolegëve të tyre.
Konflikti mes korrierëve dhe Just Eat pritet të vazhdojë të jetë në qendër të debatit mbi kushtet e punës në sektorin e shpërndarjes së ushqimit, veçanërisht për çështjen e sigurisë në punë, sigurimeve shoqërore dhe të drejtave të personave që punojnë përmes platformave digjitale, transmton SRF, Blick, përcjell BS.
