Një turne që “mungonte”. Kupa e Botës për Klube 2025 do të jetë diçka e re dhe epokale për botën e sportit, të paktën sipas Romy Gai, Drejtor i Biznesit në FIFA. Ideja për të vënë përballë klubet më të mira të kontinenteve të ndryshme ka lindur prej kohësh:
“Kupa e Botës për Klube ishte një nga idetë e para për të cilën presidenti Gianni Infantino filloi të punonte në vitin 2016”, zbulon Gai, i cili më pas thekson boshllëkun që kjo garë do të plotësojë:
“Është objektiv që mungonte, një mundësi për klubet që të përballeshin në nivel ndërkombëtar në një turne që të legjitimonte vërtet kampionin e botës”.
Risitë
Formati i ri nuk është e vetmja risi e Kupës së Botës për Klube. Gai, gjatë eventit “Një fenomen botëror – FIFA Club World Cup 2025” në Universitetin Luiss të Romës, organizuar në bashkëpunim me Tuttosport, ka zbuluar edhe disa elemente të reja:
“Ky produkt do të jetë inovativ. Gjatë turneut, do të testohet përdorimi i kamerës trupore për arbitrat, në mënyrë që të shohim me sytë e tyre se çfarë ndodh në fushë”.
Audienca Botërore
Edhe parashikimet për audiencën totale janë mbresëlënëse:
“Kemi punuar për të simuluar audiencën totale duke përfshirë edhe platformën dixhitale. Të dhënat tregojnë 3.2 miliardë shikues, një numër i jashtëzakonshëm. Vetëm për finalen, parashikimi është rreth 2 miliardë shikues”, thotë Gai.
Ai jep edhe një krahasim:
“Merrni për shembull Spanjën, e cila ka 50 milionë banorë. Nëse flasim për Real Madridin, shifrat e tij shkojnë mbi 1 miliard ndjekës, tani shumëzojeni këtë me 32 skuadrat pjesëmarrëse”.
Gai thekson edhe ndikimin ekonomik:
“Në një kohë kur komunikimi ka evoluar, është e rëndësishme të krijohet një skenë ndërkombëtare për klubet dhe sponsorët. Futbolli është global dhe klubeve u mungonte një mundësi për ta vërtetuar këtë”.
Shumë ndeshje?
FIFA është kritikuar për shtimin e ndeshjeve në një kalendar tashmë të ngarkuar për lojtarët. Por Gai i mohon akuzat:
“Luhet shumë? FIFA është përgjegjëse për vetëm 1% të totalit të ndeshjeve. Në fakt, në vitet ’70, luhej shumë më tepër sesa sot, edhe për shkak të skuadrave më të vogla”.
Ai kritikon gjithashtu klubet e mëdha për turnetë e tyre verore në SHBA, të cilat i cilëson të lodhshme dhe pa vlerë sportive:
“Nëse nuk do të kishte Kupën e Botës për Klube, të gjithë klubet e mëdha do të ishin në Amerikë për ndeshje miqësore vetëm për të rritur vizibilitetin.
Gjithçka e re përballet me kritika, por sporti evoluon njësoj si industria e argëtimit. Kjo nuk do të thotë të humbasim traditën”.
Synimi për vitin 2029
Duke ndjekur modelin e Kupës së Botës për kombëtare, Kupa e Botës për Klube do të zhvillohet çdo katër vjet:
“Është vendosur që ky kompeticion të zhvillohet çdo katër vjet, njësoj si Kupa e Botës për kombëtare. Takimi i radhës do të jetë në 2029, por ende nuk kemi vendosur vendin mikpritës, vendimi do të merret së shpejti”, njofton oranews.
