Policia e Shtetit synon të kalojë nga zbulimi i parcelave me kanabis te goditja e plotë e organizatave kriminale që financojnë, kultivojnë, shpërndajnë dhe trafikojnë lëndë narkotike. Ky është objektivi i shpallur nga drejtori i Përgjithshëm i Policisë së Shtetit, Skënder Hita, i cili ka paralajmëruar intensifikimin e operacioneve kundër rrjeteve të narkotikëve. Gjatë një konference të përbashkët me përfaqësues të Guardia di Finanza-s italiane, Hita bëri të ditur se vetëm gjatë vitit 2026 janë zhvilluar 31 operacione në kuadër të luftës kundër kultivimit dhe trafikimit të kanabisit. Ai theksoi se aksionet policore do të vijojnë, me fokus jo vetëm evidentimin e parcelave, por edhe identifikimin dhe goditjen e strukturave kriminale që qëndrojnë pas tyre.
Një ndër shqetësimet e veçanta të Policisë së Shtetit mbetet përfshirja e të miturve në veprimtari kriminale. Sipas Hitës, parandalimi i përfshirjes së të rinjve në kultivimin, shpërndarjen dhe trafikimin e drogës do të jetë një nga prioritetet për dy muajt e fundit të këtij viti dhe gjatë vitit 2027.
“Lufta kundër kanabisit duhet të vijojë deri në goditjen e zinxhirit të shpërndarjes, me qëllim që droga të mos përfundojë te të rinjtë”, deklaroi Hita. Ai nënvizoi se Policia e Shtetit do të thellojë rezultatet në këtë drejtim, duke zbatuar ligjin ndaj çdo hallke të aktivitetit kriminal, nga financimi dhe kultivimi deri te shitja dhe trafikimi i lëndëve narkotike. Në përfundim, drejtori i Përgjithshëm i Policisë garantoi qytetarët dhe partnerët ndërkombëtarë për angazhimin e institucioneve ligjzbatuese në luftën kundër krimit të organizuar.
Bashkëpunimi me institucionet italiane, veçanërisht me Guardia di Finanza-n, mbetet pjesë e këtij angazhimi, në një kohë kur objektivi i deklaruar është goditja e organizatave kriminale dhe jo vetëm e aktivitetit të tyre në terren, transmeton euronewsal.
