Vizitë zyrtare e Kryetarit të KMSHZ-së në Ambasadën e Republikës së Maqedonisë së Veriut ne Bernë
Bernë, 9 Nëntor 2026 – Kryetari i Komunitetit Musliman Shqiptar në Zvicër (KMSHZ), Fehim ef. Abazi, pas marrjes së detyrës së tij si kryetar, zhvilloi një vizitë zyrtare në Ambasadën e Republikës së Maqedonisë së Veriut, ku u prit në një takim nga Ambasadori, Shkëlqesia e Tij, z. Rexhep Demiri. Në këtë vizitë, Kryetari Abazi shoqërohej nga Rijad ef. Aliu, anëtar i Kryesisë së KMSHZ-së dhe përgjegjës për Zvicrën frankofone, si dhe Besim ef. Nuzi, anëtar i Kryesisë dhe përgjegjës për marrëdhëniet me jashtë dhe komisionet.
Takimi u zhvillua në një atmosferë të ngrohtë, miqësore dhe konstruktive, gjatë të cilit u diskutua për rëndësinë e forcimit të bashkëpunimit dhe të marrëdhënieve institucionale ndërmjet KMSHZ-së dhe Ambasadës së Republikës së Maqedonisë së Veriut. Në fokus të bisedimeve ishte gatishmëria e ndërsjellë për thellimin e komunikimit, koordinimin e aktiviteteve me interes të përbashkët dhe krijimin e mundësive të reja për bashkëpunim në të ardhmen. KMSHZ-ja shpreh mirënjohjen dhe falënderimin e saj për Ambasadorin z. Rexhep Demiri, për pritjen e përzemërt dhe gatishmërinë për bashkëpunim institucional.
Kjo vizitë përbën një hap të rëndësishëm drejt forcimit të marrëdhënieve institucionale dhe zhvillimit të një bashkëpunimi të qëndrueshëm në shërbim të komunitetit shqiptar në Zvicër. Kjo vizitë dëshmon se ndërtimi i marrëdhënieve të shëndosha institucionale kërkon dialog të vazhdueshëm, respekt të ndërsjellë dhe gatishmëri për bashkëpunim. Komuniteti Musliman Shqiptar në Zvicër, përmes angazhimeve të tij institucionale, synon të jetë një urë lidhëse ndërmjet komunitetit shqiptar dhe institucioneve diplomatike, duke kontribuar në ruajtjen e identitetit, forcimin e bashkëpunimit dhe përfaqësimin sa më dinjitoz të shqiptarëve në Zvicër. Në fund të fundit, institucionet marrin vlerë të veçantë atëherë kur bashkëpunimi i tyre përkthehet në shërbim konkret për njerëzit dhe komunitetin.
Komuniteti Musliman Shqiptar në Zvicër (KMSHZ)
