Familjet shqiptare pritet të përfitojnë një skemë të re mbështetjeje financiare për fëmijët e porsalindur. Kryeministri Edi Rama ka bërë të ditur se nga 1 korriku 2027 do të nisë zbatimi i bonusit të ri mujor për bebet, një skemë që parashikon pagesa të rregullta për një periudhë pesëvjeçare për çdo fëmijë të lindur. Sipas skemës së prezantuar, masa e mbështetjes financiare do të përcaktohet në varësi të numrit të fëmijëve në familje, duke parashikuar pagesa më të larta për fëmijën e dytë dhe të tretë. Konkretisht, për fëmijën e parë familjet do të përfitojnë 5 mijë lekë në muaj, ose 300 mijë lekë në total përgjatë pesë viteve. Për fëmijën e dytë, bonusi do të jetë 7 mijë lekë në muaj, duke arritur në 420 mijë lekë në total. Ndërsa për fëmijën e tretë, mbështetja financiare parashikohet të jetë 10 mijë lekë në muaj, ose 600 mijë lekë për të gjithë periudhën pesëvjeçare.
Kjo skemë synon të krijojë një mbështetje më të qëndrueshme për familjet, duke mos e kufizuar ndihmën financiare vetëm në një pagesë të vetme pas lindjes së fëmijës. Përmes pagesave mujore, familjet do të kenë mundësi të përballojnë më lehtë një pjesë të shpenzimeve që lidhen me ushqimin, veshmbathjen, kujdesin shëndetësor dhe nevojat e tjera të fëmijëve gjatë viteve të para të jetës.
Nisma e re vjen në një kohë kur kostot e rritjes së fëmijëve dhe sfidat demografike mbeten çështje të rëndësishme për shoqërinë shqiptare.
Pritet që në vijim të bëhen të ditura edhe detajet e plota për mënyrën e aplikimit, kriteret e përfitimit dhe procedurat që duhet të ndjekin prindërit për të marrë bonusin e ri.
Me nisjen e zbatimit më 1 korrik 2027, skema synon të vendosë një formë të re të mbështetjes ekonomike për prindërit, duke e shtrirë ndihmën financiare përgjatë pesë viteve të para të jetës së çdo fëmije, transmeton rtsh. (Foto ilustrim)
