Elon Musk kryeson listën e donatorëve individualë, me afro gjysmë miliard dollarë të investuar në mbështetje të kandidatëve republikanë. Reklamat politike dhe Super PAC-et përbëjnë pjesën kryesore të shpenzimeve elektorale.
Fushata e zgjedhjeve të mesmandatit në Shtetet e Bashkuara të Amerikës pritet të shënojë një rekord historik sa i përket financimit, me shpenzime totale që parashikohet të arrijnë në rreth 11.9 miliardë dollarë. Sipas organizatës OpenSecrets, e cila monitoron financimin e fushatave politike, kjo shifër do t’i tejkalonte ndjeshëm shpenzimet e zgjedhjeve të mesmandatit të vitit 2022. Të dhënat e Komisionit Federal të Zgjedhjeve (FEC), deri në mesin e tetorit, tregojnë se në këtë cikël zgjedhor janë shpenzuar tashmë më shumë se 9.5 miliardë dollarë. Rreth 5.5 miliardë dollarë vijnë nga PAC-et dhe Super PAC-et, organizata që mbështesin kandidatët dhe partitë politike përmes shpenzimeve të drejtpërdrejta ose indirekte.
Sipas parashikimeve, shpenzimet e përgjithshme mund të jenë rreth 30 për qind më të larta krahasuar me zgjedhjet e mesmandatit të vitit 2022.
Elon Musk, donatori më i madh individual
Në mesin e financuesve më të mëdhenj të fushatës është miliarderi Elon Musk, i cili ka dhuruar afro 500 milionë dollarë për të mbështetur kandidatët republikanë.
Pjesën më të madhe të kontributeve të tij e ka orientuar drejt organizatës America PAC, të themeluar prej tij në vitin 2024, si dhe drejt Fondit të Lidershipit të Senatit, të lidhur me republikanët.
Një pjesë e konsiderueshme e këtyre fondeve është përdorur për garën e Senatit në Teksas, ku kandidati republikan Ken Paxton përballet me demokratin James Talarico. Vetëm America PAC ka investuar më shumë se 45 milionë dollarë në këtë garë.
Musk ka mbështetur gjithashtu garat për Senatin në Michigan dhe Ohio, ku organizata e tij ka investuar rreth 10 milionë dollarë në secilin shtet.
Miliarderët dhe organizatat politike në garën e financimit
Sipas Brennan Center for Justice, 40 donatorët kryesorë kishin kontribuar me 2.4 miliardë dollarë deri më 14 tetor, një rekord për këtë fazë të një cikli zgjedhor të mesmandatit.
Përveç Musk, ndër financuesit e mëdhenj përfshihen biznesmeni Michael Bloomberg, i cili ka dhuruar më shumë se 60 milionë dollarë për kauzat demokratike, si dhe Jeff Yass dhe Richard e Elizabeth Uihlein, të cilët kanë mbështetur kauza republikane me shuma mbi 100 milionë dollarë.
Ndërkohë, organizata të lidhura me financuesin George Soros, përfshirë Geosor Corp dhe Fondin për Reformën e Politikave, kanë kontribuar së bashku me rreth 102 milionë dollarë për grupet liberale.
Reklamat politike përthithin pjesën më të madhe të fondeve
Një pjesë e madhe e parave të mbledhura nga fushatat dhe grupet politike shpenzohet për reklama televizive dhe digjitale, sondazhe, organizimin e tubimeve dhe kontaktet e drejtpërdrejta me votuesit.
Megjithatë, reklamat mbeten një nga zërat kryesorë të shpenzimeve. Sipas kompanisë AdImpact, deri në fund të tetorit, shpenzimet për reklama politike në këtë cikël kishin arritur në rreth 11.15 miliardë dollarë.
Televizioni tradicional vazhdon të jetë një nga kanalet kryesore të reklamimit politik, ndërsa shpenzimet për reklamat digjitale po shënojnë rritje.
Garat për Senatin në Michigan, Teksas dhe Ohio kanë tërhequr një pjesë të madhe të investimeve reklamuese, të ndjekura nga ato në Iowa dhe Maine.
Transparenca e financimit, një çështje e rëndësishme për zgjedhjet
Sipas rregullave zgjedhore amerikane, Super PAC-et mund të pranojnë kontribute pa kufizime nga individë, korporata, sindikata dhe organizata të tjera. Megjithatë, ato nuk mund t’ua transferojnë drejtpërdrejt këto fonde kandidatëve, por mund t’i përdorin për aktivitete të pavarura në mbështetje të tyre.
Edhe pse kandidatët, partitë dhe grupet politike janë të detyruara të raportojnë shpenzimet pranë FEC-it, të dhënat e plota për financimin e fushatës bëhen të disponueshme vetëm pas përfundimit të procesit zgjedhor. Me afro 12 miliardë dollarë shpenzime të parashikuara, zgjedhjet e mesmandatit të vitit 2026 po shënojnë një tjetër nivel të financimit të politikës amerikane, duke vënë në qendër të vëmendjes rolin e miliarderëve, korporatave dhe organizatave të pavarura në procesin elektoral, transmeton euronewsal.
