Ambasadorja e Holandës në Shqipëri, Marleen Monster, ka zhvilluar takime me Prokurorin e Përgjithshëm, Olsian Çela, dhe kreun e Strukturës së Posaçme kundër Korrupsionit dhe Krimit të Organizuar (SPAK), Klodian Braho.
Në qendër të diskutimeve ka qenë bashkëpunimi mes Shqipërisë dhe Holandës, forcimi i shtetit të së drejtës, si dhe garantimi i pavarësisë së institucioneve të drejtësisë në vend.
Përmes një reagimi zyrtar, Ambasada e Holandës ka vlerësuar rolin e institucioneve shqiptare të prokurorisë në mbrojtjen e shtetit ligjor dhe në luftën kundër korrupsionit dhe krimit të organizuar.
Gjatë takimeve, palët kanë shkëmbyer mendime mbi bashkëpunimin aktual dhe prioritetet e përbashkëta, duke nënvizuar rëndësinë e institucioneve të pavarura dhe funksionale në konsolidimin e demokracisë dhe sundimit të ligjit.
Ambasada holandeze ka rikonfirmuar gjithashtu angazhimin për vijimin e një bashkëpunimi të ngushtë dhe konstruktiv me partnerët shqiptarë, në mbështetje të reformave në drejtësi dhe forcimit të institucioneve ligjzbatuese në Shqipëri, transmeton euronewsal.
