Më 24 tetor 2026, ambasadori i Republikës së Kosovës në Japoni, Dr. Sabri Kiçmari, siç mëson helveticALforum.ch mbajti një ligjëratë para nxënësve dhe profesorëve të Shkollës së Lartë Tsuru, në Prefekturën e Yamanashit. Aktiviteti u organizua në bashkëpunim me Konsullin e Nderit të Republikës së Kosovës në Yamanashi, z. Tatsumi Akita, dhe morën pjesë rreth 50 nxënës e profesorë, përfshirë drejtorin e shkollës.
Në pjesën e parë të ligjëratës, ambasadori Kiçmari trajtoi procesin e krijimit të Republikës së Kosovës, marrëdhëniet e saj me Bashkimin Evropian, si dhe marrëdhëniet miqësore dhe bashkëpunimin ndërmjet Kosovës dhe Japonisë.
Në vijim, ai iu përgjigj pyetjeve të nxënësve lidhur me larminë kulturore dhe fetare të shoqërisë kosovare, rrënjët historike të popullit shqiptar, si dhe ngjashmëritë ndërmjet Kosovës dhe Japonisë.
Pjesa e dytë e ligjëratës iu kushtua temës “Rinia në një shoqëri globale: Përqafimi i diversitetit dhe rëndësia e të mësuarit”. Në këtë kontekst, ambasadori theksoi rëndësinë e komunikimit dhe të lidhjeve ndërmjet shoqërive, mësimit të gjuhëve të huaja, përdorimit të përgjegjshëm të teknologjisë dhe zhvillimit të mendimit kritik për të dalluar informacionin e besueshëm nga dezinformimi në rrjetet sociale. Ai gjithashtu vuri në pah rëndësinë e mbrojtjes së mjedisit dhe të luftimit të pabarazisë si përgjegjësi të përbashkëta të shoqërive në nivel global.
Gjatë bashkëbisedimit me nxënësit dhe profesorët, u trajtuan edhe çështje që lidhen me profesionin e diplomatit, rëndësinë e vlerave në politikë, politikën si profesion dhe parimet që duhet të orientojnë brezin e ardhshëm.
Në përfundim, ligjërata e ambasadorit Sabri Kiçmari në Shkollën e Lartë Tsuru në Yamanashi shërbeu si një mundësi e rëndësishme për promovimin e Kosovës, forcimin e miqësisë me Japoninë dhe nxitjen e dialogut ndërkulturor. Përmes bashkëbisedimit me nxënësit dhe profesorët, u theksua rëndësia e edukimit, mendimit kritik, respektimit të diversitetit dhe përgjegjësisë qytetare në një shoqëri gjithnjë e më të ndërlidhur. Aktiviteti dëshmoi gjithashtu rolin e diplomacisë në afrimin e popujve dhe në ndërtimin e urave të bashkëpunimit e të mirëkuptimit ndërmjet brezave dhe kulturave të ndryshme, transmeton helveticALforum.ch. / Përgatiti D.H
#MiqësiaKosovëJaponi#ShkëmbimeKulturore#EdukimiIRinisë
