Kryetari i Partisë Demokratike, Sali Berisha, mbajti fjalimin e parë pas vendimit të GJKKO për ta liruar nga masa e sigurisë “Arrest në Shtëpi”.
I rrethuar nga simpatizantë të shumtë në selinë e PD-së, Berisha tha se sot është një ditë e mirë, jo vetëm për simpatizantët e opozitës, por për të gjithë shqiptarët, përfshirë dhe kundërshtarët e tij.
Kreu i PD-së theksoi se piramida e mashtrimit për asgjësimin e opozitës mori këtë të mërkurë goditjen fatale. Ai shtoi se tashmë kryefjalë e tij dhe e opozitës shqiptare nuk do të jenë fjalimet, por aksioni.
“Piramida e mashtrimit mori sot goditjen më fatale. Sot Shqipëria u ndriçua nga rrezet e para të rikthimit të demokracisë. Sot është dita kur monstrat e demokracisë, Edi Rama dhe George Soros, dështuan përfundimisht. Dështuan në tentativën e tyre për të shkatërruar opozitën shqiptare.
Sakrifica e 330 ditëve, mundi i 3 viteve u shpërblye. Ne qëndruam dhe vetëm qëndruam për të vërtetën dhe vlerat që besojmë, pas një kohe që Shqipëria ishte e zhytur në errësirë. Sot është një ditë e mirë për shqiptarët dhe opozitarët, është një ditë shprese. Sot është një ditë e mirë edhe për ata që nuk janë opozitarë dhe për kundërshtarët e opozitës. Sot nuk fitoi Sali Berisha, por e vërteta, ligji dhe Kushtetuta. Sot ka fituar Shqipëria. Sot unë kam thyer numrin e rekordeve të fjalimeve, 330 fjalime. Tani e tutje, veprimi do të jetë kryefjala e Sali Berishës, veprimi duhet të jetë kryefjala jonë,” tha Berisha, njofton euronews albania.