Kryetari i Prishtinës, Përparim Rama, ka bërë të ditur se sonte në Taranto të Italisë do të bëhet ceremonia e dorëzimit të flamurit të Lojërave Mesdhetare, i cili do të sillet në Prishtinë. Përmes një postimi, Rama ka thënë se dorëzimi i flamurit shënon një moment historik për Kosovën, e cila në vitin 2030 do të jetë nikoqire e Lojërave Mesdhetare.
“Një flamur që sjell me vete një ëndërr të madhe. Një ëndërr që dikur dukej e pamundur, e që sot po bëhet realitet para syve tanë”, ka shkruar Rama.
Ai ka theksuar se me organizimin e Lojërave Mesdhetare, Prishtina do të mirëpresë sportistë dhe mysafirë nga vendet e Mesdheut. “Kosova po ia hap dyert Mesdheut. Prishtina do ta mirëpresë botën”, ka shkruar Rama, duke e cilësuar këtë si një hap të rëndësishëm drejt realizimit të një ëndrre të madhe për Kosovën.
Kosova e ka përmbyllur pjesëmarrjen në Lojërat Mesdhetare “Taranto 2026” me një bilanc prej 9 medaljesh, duke u renditur mes vendeve që shënuan rezultate në disa prej disiplinave sportive. Ambasadës së Republikës së Kosovës në Itali ka falenderuar sportistët kosovarë që kanë fituar 2 medalje të arta, 3 të argjendta dhe 4 të bronzta. Medaljet janë siguruar në boks, karate, xhudo dhe peshëngritje, duke bërë që përfaqësimi i Kosovës në këtë edicion të vlerësohet si i suksesshëm. Ambasada e Kosovës në Romë ka uruar të gjithë sportistët dhe ekipet e tyre për përkushtimin dhe rezultatet e arritura në Taranto. Me përfundimin e këtij edicioni, vëmendja tashmë kthehet drejt Prishtinës 2030, ku Kosova do të jetë nikoqire e Lojërave Mesdhetare, transmeton rtk.
