Gjenerali Chris McKinney, zëvendësdrejtor i Komandës Evropiane të Shteteve të Bashkuara të Amerikës (USEUCOM) për Strategji, Plane dhe Politika, ka zhvilluar gjatë këtij muaji vizitën e tij të fundit në vendet e Ballkanit Perëndimor, duke riafirmuar përkushtimin amerikan për sigurinë dhe stabilitetin rajonal.
Gjatë qëndrimit në Kosovë, gjenerali McKinney u prit në takim nga komandanti i Forcës së Sigurisë së Kosovës (FSK), gjenerallejtënant Bashkim Jashari. Në fokus të takimit ishte bashkëpunimi i ngushtë ndërmjet Kosovës dhe Shteteve të Bashkuara në fushën e mbrojtjes dhe sigurisë, si dhe zhvillimet aktuale në rajon.
Gjenerali amerikan vlerësoi lart partneritetin shumëvjeçar me institucionet e sigurisë së Kosovës, duke falënderuar komandantin Jashari për bashkëpunimin dhe koordinimin e vazhdueshëm në funksion të forcimit të sigurisë në Evropën Juglindore.
Ai theksoi se rezultatet e arritura deri më tani janë dëshmi e angazhimit të përbashkët për ruajtjen e paqes, stabilitetit dhe prosperitetit në rajon.
“Përparimi që kemi arritur së bashku pasqyron forcën e angazhimit tonë të përbashkët për një Evropë Juglindore të sigurt, të qëndrueshme dhe të begatë”, deklaroi McKinney gjatë takimit.
Në këtë takim u ritheksua edhe mbështetja e vazhdueshme e Shteteve të Bashkuara të Amerikës për modernizimin dhe zhvillimin e kapaciteteve mbrojtëse të Kosovës. Po ashtu, palët diskutuan për avancimin e bashkëpunimit rajonal në fushën e sigurisë, me theks të veçantë në koordinimin ndërinstitucional dhe ngritjen profesionale të FSK-së.
Vizita e gjeneralit McKinney konsiderohet si një tjetër sinjal i fuqishëm i mbështetjes amerikane ndaj Kosovës dhe rolit të saj në ruajtjen e stabilitetit në Ballkanin Perëndimor. Partneriteti ndërmjet Kosovës dhe SHBA-së vazhdon të mbetet një nga shtyllat kryesore të zhvillimit të sektorit të sigurisë dhe mbrojtjes në vend.
Ekspertët e sigurisë vlerësojnë se vizita të tilla kontribuojnë në forcimin e marrëdhënieve strategjike ndërmjet dy vendeve dhe në rritjen e bashkëpunimit ushtarak në nivel rajonal dhe ndërkombëtar, transmeton rtk.
