Nga stafi i helveticALForum.ch
Ansambli i Këngëve dhe i Valleve “TROJET”, i themeluar më 17 prill 2013 në Winterthur, përfaqëson një ndër iniciativat më të suksesshme të ruajtjes dhe promovimit të identitetit kulturor shqiptar në diasporë. I krijuar fillimisht si degë e Ansamblit “Vatra”, ky formacion artistik ka evoluar në një institucion të rëndësishëm kulturor, duke ndërtuar një platformë të qëndrueshme për transmetimin ndërbrezor të gjuhës, traditës dhe artit shqiptar. Përgjatë 13 viteve të veprimtarisë, “TROJET” ka arritur të konsolidojë një strukturë funksionale dhe të zgjerojë ndikimin e tij në komunitet, duke përfshirë disa gjenerata pjesëmarrësish. Ky zhvillim është mundësuar nga angazhimi i vazhdueshëm i themeluesve, bashkëpunëtorëve artistikë, prindërve dhe komunitetit më të gjerë, si dhe nga mbështetja institucionale herë pas here me modesti dhe financiare e partnerëve dhe sponsorëve.
Rëndësi të veçantë në ngritjen e cilësisë artistike ka pasur bashkëpunimi me profesionistë të fushës, si dhe përfshirja e artistëve dhe grupeve të njohura, duke kontribuar në pasurimin e repertorit dhe në rritjen e profilit publik të ansamblit. Po ashtu, roli i mediave ka qenë thelbësor në promovimin dhe dokumentimin e aktiviteteve të tij. Sot, “TROJET” nuk është vetëm një ansambël artistik, por një mekanizëm i rëndësishëm kulturor dhe edukativ, që ndikon drejtpërdrejt në formimin identitar të brezave të rinj në diasporë. Ai dëshmon se ruajtja e trashëgimisë kulturore është e mundur përmes përkushtimit kolektiv, organizimit të mirëfilltë dhe vizionit afatgjatë. Në perspektivë, vazhdimësia dhe zhvillimi i këtij misioni kërkojnë mbështetje të mëtejshme institucionale dhe angazhim të qëndrueshëm komunitar, me qëllim ruajtjen dhe avancimin e kësaj vlere të rëndësishme kulturore.
Urime 13-vjetori i Ansamblit “TROJET”!
