Policia e Kosovës ka realizuar sot ekstradimin e një shtetasi kosovar nga Zvicra drejt Kosovës, në kuadër të bashkëpunimit ndërkombëtar për luftimin e krimit.
Sipas njoftimit zyrtar, operacioni është zhvilluar nga Drejtoria për Bashkëpunim Ndërkombëtar Policor në koordinim me njësitë relevante të policisë dhe institucionet e drejtësisë. I dyshuari ishte arrestuar nga autoritetet zvicerane pasi kërkohej përmes INTERPOL me urdhër-arrest ndërkombëtar të lëshuar nga organet e drejtësisë së Kosovës.
Personi në fjalë dyshohet për veprën penale “Falsifikim i Parave” dhe për një kohë kishte arritur t’i shmangej drejtësisë. Pas përfundimit të procedurave ligjore, ekstradimi i tij u realizua në përputhje me ligjet në fuqi dhe marrëveshjet ndërkombëtare mes Kosovës dhe Zvicrës.
Pas mbërritjes në Kosovë, i dyshuari u është dorëzuar njësive përkatëse të policisë për të vazhduar me procedurat e mëtejshme ligjore.
Në njoftim theksohet se Policia e Kosovës do të vazhdojë bashkëpunimin me institucionet vendore dhe partnerët ndërkombëtarë për shkëmbim informacioni, me synim parandalimin dhe luftimin e aktiviteteve kriminale. Ky bashkëpunim përfshin hetimin, zbulimin dhe arrestimin e personave apo grupeve kriminale që veprojnë brenda dhe jashtë vendit.
Ky rast konsiderohet si një tjetër dëshmi e rëndësisë së bashkëpunimit ndërkombëtar në forcimin e sundimit të ligjit dhe ndjekjen e personave që tentojnë t’i shmangen drejtësisë, transmeton rtk.
