Ministria e Financave e Kosovës dhe Banka Botërore kanë nënshkruar sot dy marrëveshje të rëndësishme financiare me vlerë totale prej 96 milionë euro, të cilat synojnë forcimin e sektorit financiar dhe lehtësimin e tregtisë në vend.
Sipas njoftimit zyrtar, marrëveshjet përfshijnë Projektin për Zhvillimin e Sektorit Financiar (FSDP) me vlerë 50 milionë euro, si dhe Projektin për Lehtësimin e Tregtisë dhe Transportit në Ballkanin Perëndimor 2.0 (TTFP 2.0), i përbërë nga një kredi prej 35 milionë euro dhe një grant prej 12 milionë euro. Këto iniciativa janë në përputhje me standardet e Bashkimi Evropian dhe synojnë avancimin e reformave strukturore dhe investimeve strategjike.
Projekti për Zhvillimin e Sektorit Financiar parashikon mbështetjen për themelimin dhe funksionalizimin e Bankës Zhvillimore të Kosovës, rritjen e kapitalit të institucioneve financiare kyçe dhe zgjerimin e instrumenteve të garancisë kreditore për bizneset. Po ashtu, një fokus i veçantë do t’i kushtohet modernizimit të sistemit të pagesave përmes implementimit të pagesave të shpejta.
Ndërkohë, Projekti për Lehtësimin e Tregtisë dhe Transportit synon përmirësimin e infrastrukturës dhe procedurave në pikat kufitare, digjitalizimin e proceseve tregtare dhe rritjen e konkurrueshmërisë së tregut. Ky projekt pritet të afrojë më tej Kosovën me rrjetet dhe standardet evropiane, duke lehtësuar qarkullimin e mallrave dhe shërbimeve.
Ministri i Financave, Hekuran Murati, e cilësoi nënshkrimin e këtyre marrëveshjeve si një hap të rëndësishëm drejt stabilitetit financiar dhe zhvillimit ekonomik të vendit. Ai theksoi se projektet do të përmirësojnë qasjen në financa për bizneset dhe do të rrisin efikasitetin e tregtisë, duke kontribuar drejtpërdrejt në modernizimin e ekonomisë.
Nga ana tjetër, përfaqësuesja e Bankës Botërore, Xiaoqing Yu, shprehu optimizëm për zbatimin në kohë të projekteve dhe riafirmoi angazhimin e institucionit për thellimin e bashkëpunimit me Kosovën në të ardhmen.
Autoritetet vlerësojnë se këto marrëveshje do të kenë ndikim të drejtpërdrejtë në përmirësimin e klimës së biznesit, rritjen e investimeve dhe përshpejtimin e integrimit ekonomik të Kosovës në rajon dhe më gjerë, transmeton rtk.
