Nga Dashnim HEBIBI
Me rastin e 7 Marsit – Ditës së Mësuesit, kryetari i LAPSH-it për kantonin e Cyrihut në Zvicër, prof. Naser Ulaj, ka uruar të gjithë mësuesit shqiptarë kudo që ndodhen, duke shprehur mirënjohje të thellë për punën dhe përkushtimin e tyre në edukimin dhe ruajtjen e gjuhës shqipe.
Në mesazhin e tij, ai theksoi rëndësinë historike të kësaj dite, e cila lidhet me hapjen e mësonjëtores së parë shqipe në Korçë më 7 Mars 1887. Kjo ngjarje shënon një moment të rëndësishëm në historinë e arsimit dhe kulturës shqiptare, duke u bërë simbol i përpjekjeve për arsimim dhe për ruajtjen e identitetit kombëtar.
Prof. Ulaj theksoi se mësuesit shqiptarë, veçanërisht ata që punojnë në diasporë, kanë një rol të pazëvendësueshëm në ruajtjen dhe zhvillimin e gjuhës dhe kulturës shqiptare. Ai vlerësoi përkushtimin e tyre në shkollat plotësuese shqipe, të cilat për shumë fëmijë shqiptarë në mërgim janë ura që i lidh me gjuhën, historinë dhe traditat e vendit të tyre.
Në mënyrë të veçantë, ai bëri thirrje që të investohet dhe të përkrahet edhe më shumë Shkolla Plotësuese Shqipe “Naim Frashëri” në Zvicër, si dhe të gjitha shkollat shqipe në mërgatë. Sipas tij, këto institucione janë jetike për ruajtjen e identitetit kombëtar tek brezat e rinj që rriten larg atdheut.
“Ruajtja e gjuhës shqipe është ruajtje e identitetit tonë. Fëmijët tanë duhet ta njohin, ta flasin dhe ta duan gjuhën e prindërve të tyre. Shkollat shqipe në diasporë janë vendi ku mbillet kjo dashuri për gjuhën dhe kulturën tonë”, theksoi ndër të tjera prof. Ulaj.
Në fund të mesazhit të tij, ai uroi të gjithë mësuesit shqiptarë:
“Urime 7 Marsin – Ditën e Mësuesit! Faleminderit për përkushtimin, sakrificën dhe punën tuaj të palodhur në edukimin e brezave dhe në ruajtjen e gjuhës sonë të bukur shqipe.”
7 Marsi mbetet një ditë simbolike për kombin shqiptar, një ditë mirënjohjeje për të gjithë ata që me përkushtim dhe dashuri mbajnë gjallë dritën e dijes dhe të gjuhës shqipe, si në atdhe ashtu edhe në çdo cep të mërgatës shqiptare.
