Përgatiti: Dashnim HEBIBI
Filantropi dhe atdhetari nga SHBA, Sahit Muja, prezanton një teknologji transformuese në eventin më të madh të inovacionit në Amerikë
Filantropi i mirënjohur dhe veprimtari i palodhur i çështjeve kombëtare në Shtetet e Bashkuara të Amerikës, Sahit Muja, ka ndarë së fundmi një lajm të rëndësishëm me familjarët, miqtë dhe bashkëpunëtorët e tij nëpërmjet rrjeteve sociale. Me krenari dhe emocion, ai ka bërë të ditur se ekipi i tij është përzgjedhur të prezantojë një teknologji transformuese në eventin më të madh vjetor të inovacionit dhe industrisë në SHBA.
Sipas Mujës, kjo arritje shënon një kapitull të ri në rrugëtimin e tyre shkencor dhe profesional, me rrënjë të forta në vendlindjen e tij, Tropojë.
“Me kënaqësi të veçantë dhe me krenari të thellë për ekipin tim të jashtëzakonshëm, kam nderin të ndaj me ju një moment të rëndësishëm në rrugëtimin tonë shkencor”, shprehet ai në njoftimin publik.
Në qendër të këtij inovacioni qëndron një teknologji e re që synon të ofrojë zgjidhje konkrete për disa nga sfidat më të mëdha globale: sigurimin e energjisë së rinovueshme, prodhimin e ushqimit të qëndrueshëm dhe restaurimin mjedisor përmes pastrimit të ujit, ajrit, tokës dhe deteve.
Thelbi i kësaj teknologjie buron nga një bimë me potencial të jashtëzakonshëm natyror, e quajtur Vlad Bio Titan™, e cila rritet në zonën e Vladit, në Tropojë.
Kjo bimë përfaqëson, sipas Mujës, dëshminë se zgjidhjet më të mëdha globale mund të lindin nga rrënjë lokale, duke e shndërruar një pasuri natyrore shqiptare në një aset me ndikim ndërkombëtar.
Prezantimi në SHBA pritet të tërheqë vëmendjen e investitorëve, studiuesve dhe liderëve të industrisë, ndërsa projekti i dedikuar për rajonin e Ballkanit do të paraqitet në një fazë të mëvonshme. Kjo nismë synon jo vetëm zhvillimin teknologjik, por edhe fuqizimin ekonomik e mjedisor të rajonit.
Përmes këtij projekti, Sahit Muja përcjell një mesazh shprese dhe vizioni për një të ardhme më të pastër, më të qëndrueshme dhe më inteligjente. Ai u bën thirrje të gjithë vullnetmirëve ta lexojnë dhe ta shpërndajnë këtë iniciativë, duke e parë atë si një hap konkret drejt një modeli të ri zhvillimi, ku shkenca, natyra dhe përkushtimi kombëtar ecin krah për krah.
