Në kuadër të 18-vjetorit të Pavarësisë së Kosovës, Ambasada e Kosovës në Francë pati kënaqësinë të mirëpriste Selman Morinën, i shoqëruar nga motra e tij, aktorja Aphrodite de Lorraine, i cili kishte ardhur posaçërisht nga Pontarlier për këtë ngjarje të shënuar.
Me origjinë nga Peja, Selman Morina është rritur dhe ka ndërtuar karrierën e tij në Lindje të Francës, ku aktualisht mban detyrën e Përgjegjësit të Financave në një institucion bankar. Përtej angazhimit profesional, ai njihet për përkushtimin e tij të vazhdueshëm ndaj mërgatës shqiptare, duke mbështetur familje të shumta në projekte jetësore si sigurimi i banimit, integrimi profesional dhe orientimi në procedurat financiare.
Angazhimi i tij qytetar është po aq i spikatur. I zgjedhur këshilltar komunal në vitin 2014, ai ka shërbyer me përkushtim në të mirë të banorëve lokalë dhe të bashkëatdhetarëve të tij, duke qenë një zë përfaqësues dhe një urë lidhëse mes komunitetit shqiptar dhe institucioneve franceze.
Vullneti për të ndihmuar dhe për të kontribuar për vendlindjen është shfaqur herët në jetën e tij. Që në moshën 18-vjeçare, i shtyrë nga një ndjenjë e thellë humanitare, ai themeloi Shoqatën Bamirëse Kulturore të Kosovës (A.B.C.K), përmes së cilës u organizua dërgimi i një kamioni 12-tonësh me ndihma humanitare drejt Kosovës, me mbështetjen e shoqatës me shtrirje të gjerë ÉQUILIBRE.
Edhe sot, Selman Morina vazhdon të jetë aktiv si anëtar dhe nismëtar i shumë veprimtarive në kuadër të Shoqatës Dardanët në Pontarlier, duke dëshmuar se suksesi profesional mund të ecë paralelisht me përgjegjësinë shoqërore.
Figura të tilla përfaqësojnë më së miri frymën e diasporës shqiptare: të integruar, të suksesshëm dhe gjithmonë të lidhur ngushtë me rrënjët e tyre, transmeton Ambasada e Kosovës në Francë, përcjell helveticALforum.ch
