Cyrih, 05 shkurt 2026 – Siç mëson helveticALforum.ch, Shefi i Misionit Konsullor të Republikës së Kosovës në Cyrih, z. Vigan Berisha, priti në ambientet e Konsullatës artisten e njohur shqiptare Gentjana Tafili, në kuadër të aktiviteteve të rregullta të institucionit diplomatik me përfaqësues të komunitetit dhe të jetës kulturore shqiptare në Zvicër.
Takimi u zhvillua në një frymë bashkëpunimi dhe vlerësimi për kontributin që arti dhe kultura shqiptare japin në ruajtjen e identitetit kombëtar në diasporë. Z. Berisha vlerësoi rolin e artistëve shqiptarë në mërgatë, duke theksuar se Konsullata e Republikës së Kosovës mbetet e hapur për nisma që promovojnë trashëgiminë kulturore dhe forcojnë lidhjet mes komunitetit shqiptar dhe institucioneve shtetërore.
Gjatë viteve, Gentjana Tafili ka qenë e angazhuar në mënyrë të vazhdueshme në interpretimin dhe promovimin e këngës qytetare shkodrane, një nga pasuritë më të çmuara të muzikës tradicionale shqiptare. Përmes koncerteve, paraqitjeve artistike dhe aktiviteteve kulturore në Zvicër dhe më gjerë, ajo ka kontribuar ndjeshëm në ruajtjen dhe prezantimin e kësaj trashëgimie muzikore te brezat e rinj të mërgatës, si dhe në njohjen e saj nga publiku ndërkombëtar.
Artistja Tafili falënderoi Konsullatën për pritjen dhe vlerësimin, duke theksuar se mbështetja institucionale është një motivim i rëndësishëm për artistët që veprojnë jashtë atdheut. Ajo nënvizoi se misioni i saj artistik mbetet ruajtja e autenticitetit të këngës qytetare dhe transmetimi i saj si vlerë kulturore dhe identitare.
Takime të tilla, sipas palëve, janë dëshmi e rëndësisë që ka bashkëpunimi mes institucioneve shtetërore dhe krijuesve shqiptarë në diasporë, me qëllim forcimin e identitetit kulturor, promovimin e artit shqiptar dhe ruajtjen e lidhjeve të qëndrueshme me vendlindjen, transmeton helveticALforum.ch
