Përfaqësues nga qindra sipërmarrje globale, së bashku me mbi 60 krerë shtetesh dhe qeverish, janë mbledhur në Davos të Zvicrës për takimin vjetor të Forumit Ekonomik Botëror. Vëmendja kryesore këtë vit është përqendruar te pjesëmarrja e presidentit të SHBA-së, Donald Trump, e cila ka zgjuar interes të madh politik dhe mediatik.
Forumi zhvillohet në një klimë tensionesh të theksuara ndërkombëtare. Politika e jashtme e SHBA-së, konfliktet globale dhe qëndrimi i administratës Trump ndaj rendit ndërkombëtar janë ndër temat kryesore të diskutimit. Që nga pezullimi i rregullave tregtare të vendosura pas Luftës së Dytë Botërore, tërheqja nga organizata dhe marrëveshje ndërkombëtare, përfshirë Marrëveshjen e OKB-së për Klimën, deri te kërcënimet për aneksime territoriale, presidenti amerikan ka vënë në pikëpyetje themelet e multilateralizmit modern.
Fjalimi i Donald Trump, i planifikuar për të mërkurën, pritet me interes të veçantë, sidomos në sfondin e deklaratave të tij lidhur me Groenlandën, territor që i përket Danimarkës, një vend partner në NATO. Ndikimi i politikave të tij në paqen botërore, sigurinë dhe ekonominë globale do të jetë në qendër të forumit pesëditor, i cili u hap më 19 janar nën moton “Në frymën e dialogut”.
Përveç Trump, në Davos marrin pjesë figura të rëndësishme të politikës botërore, përfshirë kancelarin gjerman Friedrich Merz, kryeministrin kanadez Mark Carney, presidentin argjentinas Javier Milei, presidenten e Komisionit Evropian Ursula von der Leyen, zëvendëskryeministrin kinez He Lifeng, kryeministrin pakistanez Shehbaz Sharif dhe presidentin sirian Ahmed al-Sharaa.
Delegacion rekord nga SHBA-ja
Presidenti Trump kryeson delegacionin më të madh amerikan në historinë e Forumit Ekonomik Botëror të Davosit. Në përbërje të tij janë pesë anëtarë të kabinetit dhe zyrtarë të lartë, përfshirë Sekretarin e Shtetit Marco Rubio, të dërguarin special Steve Witkoff dhe Jared Kushner. Prania e tyre krijon terren për bisedime të nivelit të lartë mbi Ukrainën, Venezuelën, Rripin e Gazës dhe Iranin.
Në kuadër të samitit, Trump pritet të zhvillojë takime me presidentin ukrainas Volodymyr Zelensky dhe me aleatët e G7 të Kievit, për të diskutuar mbështetjen amerikane dhe garancitë e sigurisë për Ukrainën pas një marrëveshjeje të mundshme paqeje me Rusinë.
Pesha e SHBA-së në Davos reflektohet edhe në hapjen, për herë të parë, të një “Shtëpie të SHBA-së”, një hapësirë e posaçme për evente dhe takime me investitorë, e vendosur në shëtitoren kryesore të qytetit.
Forumi Ekonomik Botëror, i themeluar në vitin 1971 me synimin për të promovuar dialogun dhe bashkëpunimin ndërkombëtar, po zhvillohet këtë vit në një moment sfidues, ku multilateralizmi dhe tregtia e lirë po humbasin terren. Pikërisht për këtë arsye, Davosi shihet si një provë e rëndësishme për aftësinë e liderëve botërorë për të gjetur gjuhë të përbashkët në një botë gjithnjë e më të polarizuar, transmeton rtk.
