Kryeministri Edi Rama ka deklaruar se qeveria do të qëndrojë pranë qytetarëve të prekur nga përmbytjet dhe se ato do të dëmshpërblehen qoftë për banesat e dëmtuara ashtu edhe për gjënë e gjallë që u prek nga kjo situatë e rëndë e reshjeve intensive.
Ai kujtoi gjithashtu se qeveria ka përballuar me dinjitet detyrimet e trashëguara nga qeverisjet e mëparshme, duke përmendur përmbytjet në zonën e Shkodrës, dhe theksoi se sfidat klimatike po bëhen çdo vit më të mëdha.
“Kur ne erdhën në qeveri, me malin e borxheve që na lanë trashëgim aleatët e shiut, ishte he nj pjesë nga përmbytjet e zonës së Shkodrës. I shlyem dhe nuk kemi hyrë më në asnjë borxh të kësaj natyre me njerëzit, por kem përballuar me dinjitet jo vetëm detyrimet me përmbytjet, dhe pse sfidat e klimës janë bërë më të mprehta. Siguroj qytetarët e prekur se do të qëndrojmë me dinjitet njerëzor, shtetëror dhe politik në çdo detyrim ndaj tyre, qoftë për banesat, qoftë për gjënë e gjallë”, tha Rama.
Rama tha se mobilizimi i strukturave shtetërore dhe bashkive do të vijojë pa ndërprerje deri në kapërcimin e situatës.
Kryeministri u bëri thirrje edhe deputetëve të shumicës që të jenë pranë njerëzve dhe të angazhohen në mbështetje të tyre gjatë përballimit të situatës emergjente.
“Puna intensive dhe mobilizimi i pandalur, 24 orë në të gjithë territorin, nga të gjitha strukturat e shtetit dhe bashkitë, do të vazhdojë pa ndërprerje deri në kapërcimin e kësaj situate. Dua t’u them të gjithë deputetëve të shumicës që të jenë të angazhuar pranë njerëzve dhe me njerëzit”, tha Rama, transmeton rtsh.
