Revista e njohur amerikane “See the World” ka renditur Shqipërinë në pjesën e sipërme të një ankete vjetore për vendet më të mira në botë për gratë.
Në sondazhin, ku morën pjesë rreth 280 mijë gra nga 156 shtete, Shqipëria zë vendin e 44, duke u vlerësuar pozitivisht në disa tregues kyç si barazia gjinore, përfaqësimi i grave në parlament, të drejtat e njeriut, arsimi, fuqizimi ekonomik dhe përfshirja në jetën shoqërore.
Në rajon, Serbia renditet e para, e ndjekur nga Shqipëria, Kosova, Mali i Zi dhe Maqedonia e Veriut.
Fabiola Egro nga Qendra për Zhvillim Komunitar “Sot për të Ardhmen”, e ftuar në emisionin “Mirëmëngjes Shqipëri” deklaroi se Shqipëria ka pasur një pozicionim relativisht të mirë edhe në raportin e Forumit Ekonomik Botëror për barazinë gjinore, ku renditet në vendin e 36 nga 148 ekonomi botërore. Megjithatë, shtoi ajo, vihet re një rënie e lehtë krahasuar me vitin 2024, kur vendi renditej i 24-ti.
“Indeksi i barazisë gjinore bazohet në katër shtylla kryesore: pjesëmarrja dhe mundësitë ekonomike, arsimi, shëndeti dhe fuqizimi politik. Rënia është shënuar kryesisht në pjesëmarrjen e grave në ekonomi dhe në arsimin fillor dhe të mesëm“, thekson Egro.
Ndër sfidat më të mëdha, sipas Egros, mbetet informaliteti i lartë në punësimin e grave, veçanërisht në zonat rurale dhe mungesa e regjistrimit të tyre në skemat e sigurimeve shoqërore.
“Gratë dhe vajzat janë ende të nënpërfaqësuara në disa sektorë, sidomos në ato ku kërkohet mbështetje institucionale për t’u formalizuar. Ndërkohë, kemi një hendek të vogël gjinor në paga, por një përqindje të lartë të grave që punojnë pa kontrata“, vijon më tej ekspertja, transmeton rtsh.