Historia mijëravjeçare e Beratit prej vitesh ka marrë interesin e të huajve. Por 2025-a duket se ka qenë më e begata. Ester Xhindi, udhërrëfyese për turistët, tregon për këtë interes në rritje.
“Guida që unë kam këtu është spanjoll por kemi edhe shumë gjermanë, francezë, italianë. Çdo ditë edhe më shumë shtohen turistë nga e gjithë bota”, tha Xhindi.
“Të vizitoja Shqipërinë ishte një nga dëshirat e mia që kur isha fëmijë dhe ja ku e bëra realitet, erdha në Shqipëri. Kisha një libër në shtëpi me të gjitha kryeqytetet e botës kur isha i vogël, dhe Tirana m‘u dukë tërheqëse. Ajo më dha shtysën për të ardhur këtu. Është më e bukur se fotografia, besoj se do të vij përsëri”, tha një turistë.
“Jam nga Spanja dhe vij për herë të parë në Berat. Dje erdhëm në Shqipëri dhe sot po vizitoj kalanë e Beratit, muzetë dhe kishat mesjetare. Do të qëndroj 15 ditë dhe pastaj do vazhdoj një tur tjetër në shtetet Ballkanike. Historia e këtij vendi është e veçantë dhe gjithçka duket bukur këtu”, u shpreh një turistë tjetër.
Muzeu “Onufri” është më i vizituari. 19 mijë turiste kanë vizituar muzeun ikonografik vetëm në muajin shtator duke shënuar një rekord të deritanishëm, ndërsa që nga janari kjo shifër është 85 mijë.
“Përsëri rekordin e mbajnë vizitorët nga Polonia. Gjatë gjithë vitit ato vijnë të organizuar në grupe, këtë vit ishin të lartë dhe vizitorët francezë”, u shpreh drejtori i Muzeut “Onufri” Berat, Miklor Pasku.
Rezervimet kanë mbushur hotelet edhe për vjeshtën, të cilët po shtojnë kapacitetet akomoduese për të përballuar fluksin, transmeton rtsh.