Nga: Dashnim HEBIBI
Sot bëhen tetë vjet që ka ndërruar jetë ish-kryeministri i parë i Kosovës, Dr. Bajram Rexhepi – një personalitet i madh politik, human dhe kombëtar, që shënoi një epokë të re për vendin tonë.
Dr. Rexhepi, i lindur në Mitrovicë më 1954, do të mbahet mend si mjek i popullit, luftëtar i lirisë dhe burrë shteti i urtë që diti ta udhëheqë Kosovën në periudhën më të ndjeshme të pasluftës. Gjatë viteve 1998–1999, ai iu bashkua Ushtrisë Çlirimtare të Kosovës, duke kaluar muaj të tërë në male si mjek në Zonën Operative të Shalës. Ai nuk ishte thjesht një profesionist i shëndetësisë, por një njeri që vendosi jetën e tij në shërbim të popullit dhe luftës për liri.
Pas luftës, Dr. Bajram Rexhepi mori mbi vete përgjegjësi të mëdha publike: fillimisht si kryetar i Këshillit Bashkiak të Mitrovicës, më pas si kryetar i Mitrovicës së Jugut, dhe në vitin 2002 si Kryeministri i parë i Kosovës së pasluftës. Në atë periudhë delikate, kur vendi po formësonte institucionet e tij dhe po kërkonte identitetin e shtetit, ai ishte zëri i arsyes, i maturisë dhe i qetësisë.
Kujtimi im personal me të lidhet me një intervistë të veçantë më 11 qershor 2002, në Cyrih, për gazetën kombëtare Bota sot. Ishte ndër intervistat e para të tij si kryeministër. U shfaqëm dorë për dore në faqen e parë të gazetës, një moment që sot është kujtim i paharrueshëm. Ishte i qetë, i buzëqeshur, dhe më priti me respekt të rrallë.
Kur i tregova se isha redaktor për rubrikën Diaspora dhe se vija nga Lugina e Preshevës, më dha përgjigjet me një thjeshtësi të jashtëzakonshme, pa nxitim, me përkushtim. Më foli edhe për Luginën, duke treguar se i njihte mirë sfidat e saj. Kjo intervistë u bë pjesë edhe e librit tim Intervista në tranzicion, pjesa e II-të. Kujtimi i atij takimi është një pasuri shpirtërore që do ta ruaj për jetë.
Dr. Rexhepi nuk ishte vetëm kryeministër. Gjatë periudhës 2010–2014 ai shërbeu si Ministër i Brendshëm i Kosovës, duke mbrojtur rendin dhe sigurinë në një periudhë sfidash të shumta. Ishte një figurë që i përkiste brezit të burrave të thjeshtë e të ndershëm, që pushtetin nuk e panë si privilegj, por si detyrim ndaj popullit.
Ai ishte dhe mbetet shembull i njeriut që bashkoi në vetvete tri dimensione: humanizmin e mjekut, guximin e luftëtarit dhe maturinë e burrështetasit. Sot, tetë vjet pas ndarjes së tij nga jeta, kujtimi për Dr. Bajram Rexhepin mbetet i gjallë në zemrat e familjes, miqve dhe gjithë atyre që patën nderin ta njohin.
Ngushëllimet shkojnë për familjen e tij, për miqtë e bashkëpunëtorët e shumtë. Por mbi të gjitha, nderimi i shkon vetë Kosovës, e cila humbi një figurë të çmuar që do të kujtohet për jetë të jetëve.
Zoti e mëshiroftë dhe kujtimi i tij qoftë i përjetshëm!
Kujtim:
Ish-kryeministri i Kosovës, Bajram Rexhepi ka ndërruar jetë më 21.08.2017 në moshën 63 vjeçare në një spital në Turqi.
Ai fillimisht ishte shtruar në Qendrën Klinike Universitare të Kosovës për trajtim shëndetësor, por për shkak të gjendjes të rëndë më 25 prill ishte dërguar në Turqi.
Ndryshe, Bajram Rexhepi, kishte lindur më 3 qershor 1954 në Mitrovicë. Rexhepi kishte diplomuar në Fakultetin e Mjekësisë në Universitetin e Prishtinës në vitin 1979 dhe studimet pas-universitare i kishte përfunduar në Zagreb në vitin 1985.
Punoi për vite me radhë punoi si kirurg i përgjithshëm dhe specialist endoskopik në spitalin rajonal të Mitrovicës deri në vitin 1990.
Gjatë luftës më 1999 me Serbinë, Rexhepi i u bashkua Ushtrisë Çlirimtare të Kosovës dhe kaloi tre muaj në male duke shërbyer si mjek në zonën operative të Shalës.
Ndërkaq, më 2002 ishte zgjedhur kryeministër i parë i institucioneve të përkohshme vetëqeverise të Kosovës.
Saktësisht, më 4 mars të vitit 2002, pas tre muaj bisedimesh dhe me ndërmjetimin e kryeadministratorit të atëhershëm të Kosovës Michael Steiner, Kuvendi i Kosovës zgjodhi Bajram Rexhepin si Kryeministrin e parë të Kosovës dhe Ibrahim Rugovën si president. Rexhepi ka qenë ministër i Punëve të Brendshme.
Në periudhën e fundit, Rexhepi kishte lënë politikën dhe i ishte kthyer profesionit si kirurg në spitalin rajonal të Mitrovicës. Lavdi jetës dhe veprës së Tij! Do ta kujtojmë për jetë! (Foto nga intervista)