Zvicra po rikthen në qendër të debatit çështjen e energjisë bërthamore. Pas vendimit të qeverisë federale për të propozuar heqjen e ndalimit të ndërtimit të centraleve të reja bërthamore, parlamenti zviceran ka dhënë mbështetjen e tij për këtë ndryshim. Tashmë pritet që qytetarët zviceranë të vendosin me votë nëse vendi duhet të hapë rrugën për ndërtimin e impianteve të reja atomike, transmeton 20min.ch. Mbështetësit e energjisë bërthamore argumentojnë se Zvicra duhet të ruajë të gjitha opsionet për të garantuar furnizimin me energji elektrike në të ardhmen. Sipas tyre, kërkesa për energji do të vazhdojë të rritet dhe vendi duhet të jetë i përgatitur për sfidat e dekadave të ardhshme, veçanërisht gjatë muajve të dimrit. Nga ana tjetër, kundërshtarët paralajmërojnë për kostot e larta dhe afatet tepër të gjata të ndërtimit. Përvoja e vendeve evropiane tregon se projektet më të fundit bërthamore janë përballur me vonesa të mëdha dhe me shpenzime shumë më të larta sesa ishin parashikuar fillimisht. Në shumë raste, kostot përfundimtare kanë qenë disa herë më të mëdha se buxheti i planifikuar, ndërsa ndërtimi ka zgjatur dekada. Ekspertët theksojnë se një nga arsyet kryesore të këtyre vonesave janë standardet gjithnjë e më të rrepta të sigurisë. Profesori i Politikave të Energjisë dhe Teknologjisë në ETH Zürich, Tobias Schmidt, vlerëson se kërkesat moderne për sigurinë e centraleve bërthamore e bëjnë procesin e planifikimit dhe miratimit shumë më kompleks dhe më të kushtueshëm. Sipas tij, investitorët kërkojnë fitime më të larta pikërisht për shkak të rrezikut të vonesave dhe tejkalimit të kostove.
Një raport i Akademisë Zvicerane të Shkencave Natyrore parashikon se, edhe nëse ndalimi hiqet së shpejti, një central i ri bërthamor nuk do të mund të hynte në funksion para vitit 2050. Për më tepër, ekspertët vlerësojnë se projekte të tilla do të kërkonin mbështetje të konsiderueshme shtetërore dhe do të përballeshin me procedura të gjata ligjore dhe referendume popullore. Megjithatë, ministri federal i Energjisë, Albert Rösti, mbron idenë se energjia bërthamore mbetet një alternativë e vlefshme.
Ai argumenton se kostot e prodhimit të energjisë nga një central i ri mund të jenë konkurruese me ato të burimeve të rinovueshme, nëse projekti realizohet pa vonesa të mëdha. Debati mbetet i hapur. Ndërsa një pjesë e politikës zvicerane sheh energjinë bërthamore si garanci për sigurinë energjetike afatgjatë, të tjerët besojnë se e ardhmja duhet të ndërtohet mbi energjinë diellore, erën dhe teknologjitë e reja të ruajtjes së energjisë. Vendimi përfundimtar do të jetë në duart e qytetarëve, të cilët do të përcaktojnë drejtimin energjetik të Zvicrës për dekadat e ardhshme, transmeton 20min.ch, përcjell helveticALForum.ch.
