BERN – Për herë të parë pas katër vitesh, Zvicra pritet të rikthejë në Itali azilkërkues që kanë hyrë në territorin zviceran përmes shtetit fqinj. Sekretariati Shtetëror për Migracionin (SEM) ka konfirmuar se fluturimet e para janë rezervuar dhe kthimet e rasteve të para do të nisin në fund të gushtit, transmeton 20min.ch. Kthimet ishin bllokuar që nga viti 2022, pasi qeveria italiane e kryeministres Giorgia Meloni kishte ndaluar pranimin e azilkërkuesve që shtetet e tjera evropiane kërkonin t’i transferonin në Itali, në kuadër të rregullave të Dublinit.Sipas rregullave të Dublinit, përgjegjës për shqyrtimin e kërkesës për azil është, në shumë raste, shteti ku personi ka hyrë fillimisht në territorin e BE-së. Për Zvicrën kjo nënkupton se persona që kanë kaluar përmes Italisë mund të kthehen atje për trajtimin e kërkesës së tyre për azil.
Mund të kthehen vetëm 652 persona
Sipas të dhënave të SEM, që nga fundi i vitit 2022, Italia do të duhej të kishte pranuar rreth 3784 persona nga Zvicra. Megjithatë, një pjesë e tyre tashmë kanë përfunduar procedurat e azilit dhe kanë marrë mbrojtje në Zvicër.Nga 3784 rastet, rreth gjysma kanë fituar tashmë të drejtën për të qëndruar në Zvicër, ndërsa për më shumë se 1300 persona procedurat janë ende në vazhdim. Në skenarin më të favorshëm, Zvicra mund të kthejë rreth 652 persona, që përbën vetëm 17 për qind të rasteve.
Italia kërkon kufizim të ri
Situata është komplikuar edhe më tej nga interpretimi italian i marrëveshjes së re evropiane për migracionin. Roma dëshiron që të pranojë vetëm personat që kanë hyrë pas 12 qershorit 2026, datë që lidhet me hyrjen në fuqi të paketës së re të rregullave. Një kërkesë e tillë ka shkaktuar tashmë probleme me Gjermaninë, e cila ditët e fundit nuk arriti të realizojë një kthim të azilkërkuesve drejt Italisë.Për këtë arsye, autoritetet zvicerane po veprojnë me kujdes. SEM ka bërë të ditur se fillimisht do të testojë procedurat e reja me raste aktuale, përpara se të zgjerojë kthimet.
Mijëra persona mbeten në Zvicër
Edhe nëse Italia pranon kthimin e personave që kanë hyrë para 12 qershorit 2026, numri i të kthyerve do të jetë relativisht i vogël krahasuar me numrin e përgjithshëm të rasteve. Pas katër vitesh bllokadë, rikthimi i fluturimeve shënon një ndryshim të rëndësishëm në politikën zvicerane të azilit. Megjithatë, mbetet e paqartë se sa prej azilkërkuesve do të pranohen realisht nga Italia dhe nëse marrëveshja e re do të funksionojë pa pengesa të tjera.Për Zvicrën, çështja mbetet një test i rëndësishëm për zbatimin praktik të rregullave evropiane të migracionit dhe të sistemit të Dublinit, transmeton 20min.ch, përcjell helveticALforum.ch.
