E ngarkuara me Punë e Shteteve të Bashkuara në Tiranë, Nancy VanHorn, zhvilloi sot një takim me Kryetaren e sapoemëruar të Gjykatës Kushtetuese, Fiona Papajorgji.
Në fokus të bisedës ishin prioritetet e administratës së Presidentit Trump dhe mënyra se si institucionet shqiptare të zbatimit të ligjit mund t’i çojnë ato përpara.
Sipas njoftimit zyrtar të shpërndarë nga Ambasada Amerikane, diplomacia e SHBA-së e sheh mbështetjen për drejtësinë shqiptare të lidhur ngushtë me dy shtylla kryesore:
Çmontimi i rrjeteve të narkotrafikut.
Krijimi i kushteve të barabarta për bizneset amerikane.
VanHorn theksoi se një sistem gjyqësor funksional është parakusht për thithjen e investimeve amerikane.
Në reagimin e publikuar në rrjetet sociale, Ambasada nënvizon rolin kyç të Gjykatës Kushtetuese si garantuese e stabilitetit ligjor:
“Gjykata Kushtetuese luan një rol të rëndësishëm në garantimin e drejtësisë për qytetarët shqiptarë, duke i mbajtur përgjegjës ata që shkelin ligjet e saj dhe duke ruajtur një sistem ligjor të drejtë dhe të parashikueshëm, në mënyrë që bizneset amerikane të mund të lulëzojnë.”, transmeton rtsh.
