Bern, 28 gusht, 2026 – Një front i fuqishëm me stuhi ka përfshirë të premten pjesë të mëdha të Zvicrës, duke shkaktuar reshje intensive, erëra të forta, breshër dhe dëme të konsiderueshme. Autoritetet kanë ngritur alarmin e motit në nivelin 4, që nënkupton rrezik të madh nga stuhitë, veçanërisht në pjesët veriperëndimore të vendit, si dhe në kantonet Bern, Aargau dhe Jura. Në disa zona, kokrrat e breshrit kanë arritur madhësinë e topave të golfit, ndërsa erërat e fuqishme kanë rrëzuar struktura, tabela dhe pemë, duke shkaktuar ndërprerje në transport dhe probleme në qarkullim.
Festivali në Kloten shkatërrohet nga stuhia
Në Kloten të kantonit të Cyrihut, një festival me ushqime aziatike në rrugë është përfshirë nga moti i keq. Pamjet e dërguara nga dëshmitarët tregojnë se erërat e fuqishme kanë rrëzuar njëri pas tjetrit tendat dhe stendat e festivalit. Edhe tabela reklamuese janë marrë nga era dhe janë hedhur në ajër.
Probleme në aeroportin e Cyrihut
Stuhia ka ndikuar edhe në trafikun ajror në aeroportin e Cyrihut. Sipas aeroportit, kushtet atmosferike kanë pasur ndikim në nisjet dhe uljet e avionëve.
Të dhënat e trafikut ajror kanë treguar se disa avionë me destinacion Cyrihun kanë fluturuar në qarqe mbi Zvicër, në pritje të përmirësimit të kushteve për ulje.
Era rrëzon banka dhe tabela në Wettingen
Në stacionin e trenit në Wettingen, kantoni Aargau, erërat e forta kanë rrëzuar dhe zhvendosur disa banka. Gjithashtu janë dëmtuar një kosh mbeturinash dhe një tabelë informuese.
Në rajone të tjera, dëmet kanë qenë edhe më serioze. Në Steinmaur të kantonit të Cyrihut, kokrrat e mëdha të breshrit kanë dëmtuar një mur shtëpie, duke lënë shenja të dukshme në sipërfaqe.
Përmbytje në rrugët e Aargaut
Reshjet intensive kanë shkaktuar përmbytje në disa zona të kantonit Aargau. Në Nussbaumen, rrugët janë mbuluar nga uji, i cili në disa vende ka arritur pothuajse deri te dyert e automjeteve.
Shoferët janë detyruar të lëvizin me shumë kujdes dhe me shpejtësi të ulët përmes rrugëve të përmbytura.
Kamioni përmbyset në A1 dhe rrëzohet një shtyllë elektrike
Stuhia ka shkaktuar edhe probleme të mëdha në autostradën A1, në drejtim të Cyrihut. Një kamion është përmbysur mbi një furgon, ndërsa korsia e majtë është bllokuar.
Si pasojë, është krijuar kolonë trafiku mes pushimores Lenzburg dhe kryqëzimit Birrfeld.
Pamjet nga vendi tregojnë gjithashtu fuqinë e erës: një shtyllë elektrike është shkulur nga toka pranë autostradës.
Breshër me madhësinë e topave të golfit
Në veriperëndim të Zvicrës, veçanërisht në kantonet Bern, Solothurn dhe Aargau, janë regjistruar reshje të dendura, erëra të forta dhe breshër.
Disa dëshmitarë kanë raportuar kokrra breshri me madhësi të jashtëzakonshme, deri në përmasat e topave të golfit. Këto kanë shkaktuar dëme në ndërtesa dhe prona, transmeton 20min.ch, përcjell helveticALforum.ch.
Foto D.Hebibi
