Z. Vigan Berisha, shef i misionit konsullor të Republikës së Kosovës në Cyrih, përveç angazhimeve zyrtare, ka kthyer Konsullatën në një qendër të gjallë kulturore. Ai ka promovuar libra të autorëve nga mërgata dhe nga të gjitha trevat shqiptare, si dhe ka organizuar ekspozita artistike, duke i dhënë artit dhe kulturës shqiptare një hapësirë të denjë në zemër të Zvicrës.
Kjo nismë e tij ka ndihmuar jashtëzakonisht shumë komunitetin shqiptar, i cili përballet me kosto të larta nëse dëshiron të organizojë ngjarje kulturore në vende të tjera. Konsullata, nën drejtimin e z. Berisha, është bërë një strehë mikpritëse për aktivitete të tilla pa barrë financiare për organizatorët.
Z. Berisha ka qenë aktiv edhe në mbështetjen dhe organizimin e një sërë aktivitetesh kulturore, duke ftuar komunitetin që të përkrahë autorët dhe artistët tanë. Edhe mbrëmë, ai dha përkrahjen e tij në një organizim kulturor që prej javësh po tubon artdashës nëpër qytete të ndryshme të Zvicrës.
Në fjalën e tij përshëndetëse, z. Berisha tha:
“Mbrëmë, në hapësirat e Konsullatës së Republikës së Kosovës në Cyrih, u hap me shumë sukses ekspozita personale e artistit Urim Berisha. Në një atmosferë të ngrohtë dhe krijuese, të pranishmit patën mundësinë të përjetojnë nga afër një qasje të thellë estetike dhe konceptuale, ku numrat marrin kuptime të reja – nga simbole të ftohta matematikore në gjurmë të ngarkuara me mesazhe kulturore, filozofike e emocionale. Falënderojmë të gjithë të pranishmit për pjesëmarrjen dhe përkrahjen e vazhdueshme ndaj artit dhe artistëve tanë!”
Ekspozita do të mbetet e hapur edhe në javët në vijim. Autori Urim Berisha u nda i kënaqur nga mbrëmja dhe pati mundësinë të bashkëbisedojë me shumë artdashës që kishin ardhur për ta përkrahur.
SAM24.info