Vigan Berisha Shef i Misionit Konsullor i Republikës së Kosovës në Cyrih, sot me datë 10.12.2024, mu në Ditën Ndërkombëtare të të Drejtave të Njeriut, ka arritur edhe një synim shumë të rëndësishëm, ose njërin nga prioritet e tij që nga dita e parë e mandatit.
Përmes një postimi në rrjetet sociale, z.Berisha thekson se:
“Të dashur miq,
Që nga dita e parë e emërimit tim si Shef i Misionit në Konsullatën e Republikës së Kosovës në Cyrih, kam pasur një synim të qartë: të krijoj kushte të barabarta dhe dinjitoze për çdo qytetar, pa asnjë përjashtim.
Pikërisht sot, më 10 Dhjetor 2024, në Ditën Ndërkombëtare të të Drejtave të Njeriut, ky synim mori formë konkrete me përurimin e ashensorit për personat me nevoja të veçanta. Ky projekt ka qenë një prioritet që nga dita e parë e mandatit tim dhe për të cilin kam punuar me përkushtim.
Ky ashensor është një hap i rëndësishëm dhe simbolik për përmbushjen e angazhimeve tona në mbrojtjen e të drejtave të njeriut dhe për të siguruar qasje të barabartë për të gjithë.
Ky projekt u realizua falë mbështetjes së jashtëzakonshme të z. Ekrem Hasani, CEO i Spitex Melina’s Medical Care, të cilit i shpreh mirënjohjen time të thellë për ndihmën dhe përkushtimin e tij të veçantë. Në përurimin e këtij ashensori ishin të pranishëm edhe Deputeti i Parlamentit të Konfederatës Zvicerane, z. Islam Alija, dhe aktivistja e shquar për të Drejtat e Njeriut, znj. Valdete Hoti, të cilëve u jam mirënjohës për mbështetje dhe praninë e tyre.
Ky është një moment historik dhe një hap përpara në krijimin e mundësive të barabarta për të gjithë, si një shenjë e angazhimit të vazhdueshëm për të bërë të drejtat e njeriut realitet, çdo ditë.
Faleminderit të gjithëve që ishin pjesë e këtij momenti dhe që ndanë me ne këtë ditë të veçantë“.
helveticALforum.ch