Në emër të stafit të stafit të Institutit Shkencor Helvetik të Evropës Juglindore me qendër në Cyrih, kemi nderin t’u përcjellim urimet më të ngrohta të gjithë bashkëkombësve tanë të besimit mysliman, kudo që ndodhen, me rastin e Festës së Kurban Bajramit.
Kjo festë e shenjtë, që simbolizon sakrificën dhe përkushtimin, na kujton rëndësinë e vlerave të përjetshme përballë gjërave kalimtare. Të gjithëve që e festojnë, u dëshirojmë që të ruajnë thellë në zemër modestinë, mirësinë dhe ndershmërinë – në mendim e në vepër.
Paqja dhe qetësia nisin nga brenda vetes. Le të jemi falënderues për atë që kemi dhe të gatshëm të ndihmojmë të tjerët me sinqeritet dhe dashuri. Largimi nga e kota dhe e tepërta materiale na afron më shumë me Zotin dhe na hap zemrën ndaj gëzimit, bujarisë dhe altruizmit.
Jetojmë në një shoqëri që përkrah miqësinë ndërfetare dhe vlerat e respektit e mirëkuptimit ndaj njëri-tjetrit – vlera që kanë qenë gjithmonë pjesë e identitetit tonë.
Urojmë që kjo festë t’ju mbushë zemrat me paqe, ngrohtësi dhe mirësi, shtëpitë me lumturi dhe sinqeritet, dhe të shërbejë si frymëzim për të forcuar besimin, bashkëpunimin dhe solidaritetin ndërmjet njerëzve.
Besimtarëve që ndodhen në Haxh, Zoti ua pranoftë Haxhin dhe lutjet e tyre.
Gëzuar Kurban Bajramin! Paçi shëndet, dashuri dhe mbarësi për shumë vite!
Instituti Shkencor Helvetik i Evropës Juglindore