Nën titullin bombastik ‘Shqipëria përdor fuqinë e lumenjve: “Një lider global i burimeve të rinovueshme”, platforma Mesenger ka ekspozuar së fundmi fakte të shifruara mbi prodhimin dhe përdorimin e energjisë në Shqipëri.
Duke iu referuar faktit të Suksesit të Shqipërisë në përdorimin e burimeve të rinovueshme nga kombinimi i kushteve natyrore, kryesisht lumenjve të bollshëm, dhe politikës strategjike të qeverisë, artikulli vë në dukje ambicien e shqiptarëve që të arrijnë të marrin 54.4% të konsumit të përgjithshëm bruto të energjisë nga burimet e rinovueshme deri në vitin 2030. Ndërsa energjia elektrike prodhohet tërësisht nga burimet e rinovueshme, aktualisht ajo përbën vetëm 28% të konsumit total të energjisë në vend.
Prodhimi 100% e energjisë elektrike nga burimet e rinovueshme e vendos vendin mes vetëm shtatë vendeve të tillë në botë, duke iu referuar një raporti nga RatedPower, një kompani e fokusuar në teknologjinë e energjisë së rinovueshme. Përveç Shqipërisë, këto vende janë: Islanda, Butani, Nepal, Paraguaj, Etiopi, Republika Demokratike e Kongos.
Për arritjen e këtij realiteti, raporti konstaton si burim suksesi marrjen e masave ligjore që mundësuan mobilizimin e fondeve për efiçencën e energjisë dhe zhvillimin e burimeve të rinovueshme nga familjet dhe sektori privat. Po ashtu ligji i energjisë së rinovueshme konsiderohet të veprojë për lehtësimin e përdorimit të burimeve të rinovueshme duke krijuar më shumë hidrocentrale të vegjël, kolektorë termikë diellorë, termocentrale diellore dhe sisteme ngrohjeje me biomasë.
Nga ana tjetër, veçohet fakti vendi përpiqet të diversifikojë burimet e saj të energjisë përtej hidrocentraleve, duke sjellë në vëmendje fokusin për përfshirjen e energjisë së erës në prodhimin e energjisë. Shqipëria vlerësohet të ketë potencial të konsiderueshëm për prodhimin e energjisë diellore dhe të erës, vendndodhje të favorshme gjeografike, kushte klimatike dhe nivele të larta të rrezatimit diellor. Mbështetësit për një diversifikim të tillë theksojnë se, së pari, hidrocentralet varen shumë nga variacionet klimatike. Së dyti, zhvillimi i hidrocentraleve në vend ka ngjallur polemika të shumta , pasi ato nuk vijnë pa ndikim mjedisor, njofton rtsh.