Përgaditi: Dashnim HEBIBI
Kryetari i Shoqatës “Miqtë e Amerikës” në Prishtinë, Agim Rexhepi, ka nderuar sot Znj. Shukrije Ramadani, Zv/Ambasadorja e Kosovës në Zvicër dhe bashkëshortja e Heroit të madh Agim Ramadani, me një dhuratë të veçantë – një flamur amerikan me histori të jashtëzakonshme.
Ky flamur ka qëndruar i ngritur në shtizë pranë shtatores së Presidentit Bill Clinton në Prishtinë, duke shënuar një simbol të përhershëm të miqësisë së popullit shqiptar me Shtetet e Bashkuara të Amerikës, si dhe të mirënjohjes për ndihmën historike në kohët më të vështira.
Me këtë rast, Rexhepi shprehu ndjenjat e tij të respektit dhe mirënjohjes:
“Sot pata nderin dhe kënaqësinë t’ia dorëzoj Znj. Shukrije Ramadani një flamur amerikan me histori të veçantë. Ky flamur është simbol respekti e mirënjohjeje të përhershme për veprën madhështore të Heroit Agim Ramadani dhe sakrificën e familjes së tij. Është e pamundur të shprehim me fjalë gjithë madhështinë e jetës dhe veprës së tij. Zoti e bekoftë familjen Ramadani!”
Ky gjest është cilësuar si një akt simbolik i kujtesës dhe i mirënjohjes për kontributin e madh të Heroit Agim Ramadani, emri i të cilit është i gdhendur në historinë e Kosovës si simbol i guximit dhe i lirisë.
SAM24.info