Nga: Dashnim HEBIBI
Shkencëtari i mirënjohur shqiptar që jeton dhe vepron në Zvicër, Prof.dr. Çitaku, do të marrë pjesë këtë javë në një konferencë shkencore ndërkombëtare që do të mbahet në Kuala Lumpur, Malajzi. I njohur për kontributin e tij në fushën e neurolidershipit dhe për pjesëmarrjen aktive në konferenca të shumta shkencore ndërkombëtare, z. Çitaku këtë herë do të prezantojë dy nga modelet e tij inovative me emra shqip:
Modelin e Kompetencave të Lidershipit “DRENICA” dhe Modelin “Çitaku”.
Përpara nisjes, ai ndau një përshëndetje me ndjekësit e tij nga Amsterdami, rrugës për në Kuala Lumpur:
“Përshëndetje nga Amsterdami, rrugës për në Kuala Lumpur, Malajzi. Misioni i konferencës shkencore së radhës thërret, ku do të sjellë inovacionet nga shkenca e neurolidershipit, ku janë të përfshira Modelet e Kompetencave të Lidershipit DRENICA dhe Çitaku!”
Modeli “DRENICA”, i ndërtuar mbi vlera dhe principe të lidershipit modern, bart simbolikën e qëndrueshmërisë dhe identitetit shqiptar, ndërsa modeli “Çitaku” është tashmë i pranuar gjerësisht në qarqet akademike si një kontribut origjinal në fushën e zhvillimit të lidershipit dhe inteligjencës emocionale.
Pjesëmarrja e z. Çitaku në këtë konferencë jo vetëm që forcon pozitën e tij si një prej emrave më të njohur në neurolidership, por gjithashtu promovon vlerat dhe identitetin shqiptar në një skenë globale shkencore.