Sipas tyre, partitë duhet të fokusohen më shumë në programe sesa në kritika të ndërsjella. Pikërisht për gjuhën e papërshtatshme të përdorur nga subjektet politike, PZAP deri më tani ka gjobitur subjektet politike në total me 432,400 euro.
Gjatë kësaj fushate zgjedhore, qytetarët thonë se janë zhgënjyer me gjuhën e përdorur në raste të caktuara nga subjektet politike nëpër tubime elektorale. Sipas tyre, gjuha fyese dhe kritikuese po ndikon në përçarje te qytetarët, gjë që duhej të ndodhte e kundërta.
Pikërisht për shkak të gjuhës së papërshtatshme, PZAP për këto tri javë fushatë ka dënuar në total me 432,400 euro gjoba subjektet politike që kanë kryer shkelje ligjore të Kodit të Etikës. Këto gjoba janë shqiptuar kryesisht për shkelje lidhur me gjuhë nxitëse të urrejtjes, përdorim të resurseve publike, vendosje të materialit zgjedhor në hapësira publike dhe përdorim të fëmijëve në fushatë zgjedhore.
LDK është dënuar me 113,500 euro, LVV me 101,500 euro, PDK me 87,000 euro, AAK me 69,700 euro, Koalicioni për Familjen me 25,500 euro, Lista Serbe me 13,500 euro, PLE – Partia Liberale Egjiptiane me 3,000 euro, SRB Demokratija me 7,500 euro, Partia Kosovksi SRBA me 7,200 euro, Nova Stranka me 1,500 euro, IRDK me 1,500 euro dhe Partia e Ashkalinjve për Integrim me 1,000 euro./Trendelina Ramdani/RTK
