Nga: Shefqet CAKOLLI – President i SH.K.A “Dardania” në Zvicër
Roli ynë në shoqëri na imponon edhe përgjegjësi të tjera përtej pushimeve. Edhe pse pas tyre na ndjekin vizitat, dasmat, shëtitjet, festivalet apo kolonat e gjata në trafik – si mbrëmë nga Prishtina deri në Zatriq të Rahovecit, një rrugë që zgjati tri orë e gjysmë – dëshira dhe përkushtimi për kulturën mbizotërojnë gjithmonë. Ne kishim një qëllim të caktuar: të ruajmë dhe kultivojmë trashëgiminë dhe kulturën tonë kombëtare.
Kësaj here, misioni ynë na çoi në fshatin e largët Zatriq të Rahovecit, ku kishim për qëllim të vizitonim një zonjë të veçantë që ruan dhe punon me përkushtim veshjet tona kombëtare.
Bëhet fjalë për znj. Selvete Kastrati, e cila në punëtorinë e saj në këtë fshat, me vlera të mëdha historike dhe kulturore – një vend që ka përjetuar edhe djegie e përndjekje gjatë luftës nga regjimi serb – vazhdon me pasion e përkushtim të madh të ruajë identitetin tonë kulturor.
Me znj. Selvete jemi njohur vite më parë. Takimi i parë ishte në Prizren, në një lokal të veshjeve kombëtare – “Arta Suvenire”, më pas “Delvina” – pas festivalit “Hasi Jehon 2012”, ku fituam tri çmime, përfshirë edhe çmimin e parë. Znj. Selvete, që na kishte ndjekur me vëmendje, u bë prej atëherë një kontakt i rëndësishëm për bashkëpunim rreth veshjeve dhe konsultimeve për to.
Që nga ajo kohë, filloi një bashkëpunim i mirëfilltë, ku ajo përmbushi me saktësi çdo porosi tonën, deri në momentin kur vendosi të hapë punëtorinë e saj në fshatin e lindjes. Puna cilësore dhe përkushtimi i saj shpejt morën përmasa më të mëdha, duke u përfaqësuar në panaire, kurse, simpoziume dhe sfilata në qytete dhe shtete të ndryshme si Shqipëri, Suedi, Maqedoni, Zvicër e më gjerë.
Përkushtimi i saj e ka bërë mysafire në shumë televizione dhe radio, përfshirë edhe radion tonë “Zëri Ynë”, në bashkëpunim me Radio Stadtfilter në Winterthur të Zvicrës.
Gjatë dekadës së fundit, për çdo veshje që na është dashur për ansamblin tonë, kemi bashkëpunuar me znj. Selvete. Me përkushtimin e saj të pandalshëm, ajo ka ditur gjithmonë të përmbushë kërkesat tona, duke ruajtur origjinalitetin e çdo krahine e zone, me përputhje të plotë në veshje dhe valle – sepse edhe vetë kryesia dhe stafi ynë artistik përfaqëson pothuajse të gjitha trevat shqiptare.
Adresa e këtij bashkëpunimi të jashtëzakonshëm është punëtoria “Anadrini dhe Veshje të Bukura Kombëtare”, ku znj. Selvete Kastrati punon me zell dhe përkushtim të rrallë.
Veshjet e punuara nga duart e saj sot mund t’i shohim të përfaqësuara në ansamble shqiptare anembanë botës – nga Amerika dhe Australia e largët, deri në Evropë, Kosovë, Mal të Zi, Maqedoni e Shqipëri!
E tille do mbetet bujare, e tille do mbetet korrekte, duke i deshirua gjithe të mirat dhe suksese te saja në ruajtjen dhe kultivimin e trashigimisë sone kulturore përmes veshjeve kombëtare!
Prishtinë, 02 gusht 2025