Winterthur, Zvicër – më 25 maj 2025 ( e diel), do të mbahet promovimi i librit në dy vëllime “Gratë Frymëzuese të Diasporës Shqiptare”, nga autori PhD. Dashnim Hebibi, një vepër unike që sjell në fokus rolin, sakrificën dhe kontributin e jashtëzakonshëm të grave shqiptare në mërgatë. Pas promovimit të suksesshëm në Zagreb, autori nuk ka harruar as mërgatën shqiptare në Zvicër, ku janë të përfshira disa prej personazheve të dy vëllimeve të librit të tij, për të vazhduar më pas me prezentime edhe në shtete të tjera ku jeton mërgata shqiptare.
Ky libër, i pari i këtij lloji në fushën e studimeve mbi diasporën shqiptare, është rezultat i një pune hulumtuese të thellë, me 186 intervista të realizuara me gra shqiptare nga e gjithë bota. Nëpërmjet një qasjeje empirikisht të bazuar, autori hedh dritë mbi histori personale frymëzuese dhe rrëfime që pasqyrojnë përkushtimin e tyre ndaj atdheut dhe ruajtjes së identitetit kombëtar.
Ngjarja organizohet me përkrahjen e Institutit Shkencor Helvetik të Evropës Juglindore dhe Swiss Albanian Media Center (SAM24.info).
Data: E diel, 25 maj 2025
Ora: 14:00
Vendi: Schulhaus, Talgutstrasse 71, 8400 Winterthur
Në këtë promovim do të jenë të pranishëm:
- Ambasadori i Republikës së Kosovës
- Ambasadori i Maqedonisë së Veriut
- Sekretari i Parë i Ambasadës së Shqipërisë
- Redaktori i veprave
Ngjarja do të moderohet nga vetë autori dhe do të zgjasë rreth 90 minuta, duke përfshirë edhe një program artistik modest. Në dispozicion do të ketë hapësira të mjaftueshme për parkim.
Ky promovim është një homazh për figurën e gruas shqiptare në diasporë dhe një ftesë për reflektim, vlerësim dhe mirënjohje publike për kontributin e saj në ruajtjen e trashëgimisë kulturore dhe kombëtare.
Prandaj, kemi kënaqësinë t`ju ftojmë në promovimin e librit në dy vëllimësh. Pjesëmarrja juaj do të jetë nder dhe vlerësim për këtë kontribut të veçantë. Ju mirëpresim!
Për më shumë informata: +41 79 265 17 77
Organizatorët