/ Nga: Dashnim HEBIBI /
Shkencëtari i njohur, jo vetëm në Zvicër por edhe përtej saj, Prof. Dr. Xhavit Lipaj, u nderua dje në Londër me titujt më të lartë akademikë, një moment historik në udhëtimin e tij të gjatë dhe të përkushtuar në fushën e shëndetësisë dhe menaxhimit. Në një ceremoni solemne, ai mori doktoratën në Health Care & Management, titullin Profesor, si dhe Doctor of Business Administration (DBA), duke u bërë i vetmi shqiptar që arrin këtë vlerësim në një nga institucionet më të njohura akademike në zemër të Londrës.
Para ceremonisë zyrtare, Prof. Dr. Lipaj vizitoi Ambasadën e Republikës së Kosovës në Mbretërinë e Bashkuar, ku u prit përzemërsisht nga Shkëlqesia e Tij, Ambasadori Ilir Kapiti. Në këtë takim simbolik, ai ndau një gotë ujë me ambasadorin, një gjest i thjeshtë, por thellësisht domethënës për një njeri që kurrë nuk e harron rrënjën dhe sakrificën për Kosovën.
“Edhe pse ceremonia u mbajt në një pjesë tjetër të Londrës, nuk mund të anashkaloja Shtëpinë e Kosovës. E ndjeva të domosdoshme të përqafoj ambasadorin e shtetit tim, për të cilin kemi sakrifikuar shumë,”, tha Prof. Dr. Lipaj për sam24.info, me një emocion që buronte thellë nga shpirti i nënës së tij dhe kujtimi i të gjithë atyre që dhanë jetën për Kosovën.
Nga ana e tij, Ambasadori Ilir Kapiti, duke komentuar vizitën, deklaroi:
“Takimet me profesionistë shqiptarë, kudo që punojnë e kontribuojnë në botë, janë gjithmonë një kënaqësi dhe frymëzim. Këtë javë patëm nderin të mirëpresim në Ambasadën e Republikës së Kosovës në Londër Prof. Dr. Xhavit Lipaj, i cili u nderua me titullin ‘Profesor’ dhe mori doktoratën në Shëndetësi dhe Menaxhim dhe Titullin Doctor of Business Administration, DBA), një vlerësim i merituar për arritjet e tij të jashtëzakonshme akademike dhe profesionale. Shumë urime Profesor, dhe suksese të mëtejshme në shërbim të kujdesit shëndetësor, humanizmit dhe vlerave që na bashkojnë!”
Ky takim shkon përtej çdo protokolli diplomatik: është një përqafim i kombit, një përulje para dijes dhe një mirënjohje e heshtur për të kaluarën e dhimbshme, e cila u shndërrua në forcë, krenari dhe sukses.
SAM24.info