/ Nga: Dashnim HEBIBI, Londër /
Ekskluzive nga Londra: Ditë e Dritës për Shkencën dhe Nderin Shqiptar
Nga përkushtimi personal te përgjegjësia akademike dhe njerëzore
Londër, 30 Maj 2025 – Në një ndër ambientet më përfaqësuese të dijes ndërkombëtare, më 30 maj 2025, konkretisht para pak çastesh edhe ate në zemër të Londrës, u zhvillua ceremonia solemne ku Prof. Dr. Xhavit Lipaj u nderua me titullin “Profesor” si dhe me doktoratën në Shëndetësi dhe Menaxhim (Doctor of Business Administration – DBA).
I rrethuar nga figura akademike, kolegë, diplomatë dhe dashamirës, ky moment shënoi jo vetëm një kulm profesional për një individ, por një festë të heshtur të kombit – për të gjithë ata që besojnë se dija është rruga më e sigurt drejt emancipimit dhe përparimit.
Një udhëtim që nis nga rrënjët e thella shqiptare
Prof. Dr. Xhavit Lipaj është një emër i njohur për mërgatën shqiptare në Zvicër, veçanërisht në fushën e shëndetësisë dhe menaxhimit institucional. Rruga e tij nisi nga trevat shqiptare, në një kontekst ku fjala kishte peshë, ndërsa shkolla ishte sakrificë. Ai vjen nga një familje me vlera të larta kombëtare, ku puna dhe ndershmëria ishin mësuar para se të mësohej shkronja.
Me një shpirt të qetë, por me një brendësi të fuqishme, ai e ndërtoi jetën me themele të forta: mbi dije, përulësi dhe përkushtim. Dhe kjo rrugë, që nisi ndër librat në dritën e zbehtë të fëmijërisë, e çoi deri te auditorët prestigjiozë të Zvicrës dhe sot të Londrës.
„Ky titull nuk është vetëm kurorë. Është barrë fisnike”
Në fjalën e tij, Lipaj preku me thellësi shpirtërore dhe kthjelltësi mendimi:
“Ky titull nuk më bën më shumë se ç’kam qenë, por më obligon të jem më shumë për të tjerët. Dija është një barrë fisnike – sa më shumë ta ndajmë, aq më lehtë e mbajmë. Këto nuk janë gradime personale, por detyra kolektive ndaj shoqërisë, ndaj brezit të ri dhe ndaj atyre që na kanë rritur me sakrificë.”
Në sytë e tij, krenaria ishte e matur, gëzimi i kontrolluar, siç ndodh vetëm te ata që janë rritur me vlera. Ai i përmendi me ndjeshmëri figurat kyçe që e kanë përkrahur në rrugëtimin e tij – nënën e ndjerë, bashkëshorten e përkushtuar Maki, familjen, kolegët, miqtë dhe pacientët që i besojnë çdo ditë.
Poet i shpirtit dhe njeri i profesionit
Përtej titujve akademikë, Xhavit Lipaj është edhe poet, autor i disa librave të mirëpritur nga lexuesit dhe kritika. Vargjet e tij nuk janë thjesht zbrazje emocionale, por reflektim filozofik, kujtesë e rrënjëve, dashuri për nënën, tokën dhe njeriun e thjeshtë.
Lirika e tij është si një zgjatim i profesionit – aty ku mjekësia përkujdeset për trupin, poezia shëron shpirtin. Ai ka arritur të mbetet një model i modestisë, edhe atëherë kur duart e tij kanë firmosur dokumente të rëndësishme e kur emri i tij është përmendur në revista shkencore ndërkombëtare.
Zemra e tij, gjithnjë pranë popullit të vet
Në ditën më të rëndësishme të karrierës së tij, ai nuk harroi të ndalonte po dje në Ambasadën e Republikës së Kosovës në Londër, ku u prit nga ambasadori dhe stafi diplomatik. “Isha atje si bir i një vendi që më ka rritur me kujtime dhe dhimbje, por edhe krenari. Shteti i Kosovës nuk është thjesht flamur – është nëna ime, është populli im, është amaneti i brezit para meje,” – tha ai, ndërsa sytë i shkëlqenin.
“I gjithë ky sukses, këtë ditë të madhe, ia dedikoj nënës sime të shenjtë, e cila më rriti me mund dhe me ndershmëri, dhe që sot më sheh nga përjetësia. E ia dedikoj familjes sime që ka duruar mungesën time, klientëve që më kanë besuar kujdesin e tyre, dhe shoqërisë shqiptare, që më ka mësuar ç’është sakrifica.”
Shkenca si mision dhe Zvicra si vend mundësish
Në Andermatt të Zvicrës, ku Prof. Dr. Lipaj jeton dhe punon, ai është më shumë se një drejtues. Ai është një figurinë e respektit – ndër kolegë, pacientë dhe komunitet. Ka ndërtuar një jetë me mund, por mbi të gjitha me vlera, duke treguar se diaspora nuk është thjesht ikje, por ekspansion i dijes dhe identitetit.
“Zvicra më dha mundësinë të rritem profesionalisht. Por unë nuk i përkas vetëm Zvicrës. Jam i popullit tim, i profesionit tim. Jam i secilit që ka besuar se edhe nga një fshat i vogël mund të nisesh për të bërë gjëra të mëdha.”
Një ditë që i përket gjithë kombit
Sot, kombi shqiptar ka një tjetër zë të fuqishëm në arenën akademike dhe shkencore botërore. Prof. Dr. Xhavit Lipaj është shembulli i njeriut që ecën me përulësi, flet pak, punon shumë dhe frymëzon thellë. Ai është dëshmi se nderi i kombit nuk qëndron në fjalë të mëdha, por në vepra të mëdha dhe në karakter të pastër.
Ekipi i SAM24.info ka nderin që ishte ndër të parët që dokumentoi këtë moment historik.
Në emër të stafit tonë dhe lexuesve tanë, themi me gjithë zemër:
Urime, Profesor! Urime, Doktor! Kombi është krenar me Ty.