Nga Dashnim HEBIBI
Fotoreportazh
Cyrih, 28 gusht 2025 – Në mbrëmjen e së enjtes, në Konsullatën e Kosovës në Cyrih u zhvillua një takim i veçantë e tepër emocional. Në një atmosferë mirësie e respekti, u hapën dyert e konsullatës për veprimtarë të mërgatës edhe jashtë orarit të punës, ku shefi i misionit konsullor, z. Vigan Berisha, solli edhe një herë kulturën e afrimit dhe bashkëpunimit të diasporës me institucionet e shtetit të Kosovës.
Emri dhe veprimtaria e publicistit, shkrimtarit, poetit, atdhetarit dhe bamirësit Shefqet Dibrani janë të njohura jo vetëm për shqiptarët në Zvicër, por edhe për bashkëkombësit kudo që ndodhen. Pikërisht ai, në ditët e fundit të punës së tij përpara daljes në pension më 29 gusht, zgjodhi ta vizitojë Konsullatën e Kosovës për të falënderuar personalisht z. Vigan Berisha dhe stafin e tij.
Dibrani, i shoqëruar nga miku i tij i kahmotshëm, veprimtari dhe asamblisti i qytetit të Arbonit, z. Islam Sadiku, udhëtoi enkas nga St. Galleni për këtë takim. Në këtë mbrëmje ai shprehu falënderime për mikpritjen, për punën e ndershme dhe përkushtimin e stafit të konsullatës. Ai dhuroi disa nga librat e tij, si shenjë respekti dhe kujtese për institucionin që përfaqëson shtetin e Kosovës.
“Erdha me të falënderu për mirësjelljen që ke tregu në takimet tona. Edhe nesër e kam ditën e fundit të punës dhe dal në pension. Konsullata ka një staf të mirë, e keni afru një dashuri shpirtërore për mërgatën dhe uroj të vazhdoni kështu. Tash do të jetoj më shumë në Kosovë, por Zvicrën nuk do ta harroj kurrë, sepse këtu më ka kaluar jeta,” tha me emocione z. Dibrani.
Nga ana e tij, shefi i misionit konsullor, z. Vigan Berisha, e cilësoi këtë vizitë si një nder të madh:
“Jam i nderuar që e mbyllni punën tuaj me një vizitë në këtë konsullatë. Ky institucion është ngritur falë punës dhe sakrificave të mërgatës, gjakut të dëshmorëve dhe kontributit të njerëzve si ju. Ne jemi kujdestarë të kësaj trashëgimie dhe përpiqemi që ta përfaqësojmë Kosovën me dinjitet.”
Në këtë mbrëmje u theksuan edhe kujtimet e shumta nga jeta dhe veprimtaria e Dibranit.
Ai solli rrëfime nga vitet e para të qëndrimit në Zvicër, ku kishte mbërritur në vitin 1994 dhe kishte kaluar plot 37 vjet e 6 muaj në mërgim, gjithmonë duke u angazhuar për çështjen kombëtare, përmes penës, veprimtarisë dhe solidaritetit me atdheun.
Një moment i veçantë ishte edhe dorëzimi i një mirënjohjeje nga ana e z. Berisha në emër të Konsullatës dhe stafit, si shenjë respekti për veprimtarinë e z. Dibrani. Ky gjest u përjetua me emocione të mëdha, ku lotët e gëzimit dhe krenarisë ishin të dukshëm.
Edhe miku i tij, z. Islam Sadiku, kujtoi miqësinë e gjatë me Dibranin, duke thënë se do t’i mungojë prania e tij e përditshme në Zvicër, por është i bindur se lidhjet me mërgatën nuk do të shuhen kurrë. Ndërkohë, gazetari PhD Dashnim Hebibi solli në kujtesë bashkëpunimin me Dibranin në gazetën Bota Sot, ku ai kishte dhënë shembullin e tij për pedanterinë dhe përkushtimin ndaj fjalës së shkruar.
Në këtë mbrëmje morën pjesë edhe bashkëpunëtorët e ngushtë të konsullatës:
• z. Avni Zejnullahu, zv. Konsull i cili njihet për kujdesin e tij në shërbimin ndaj bashkardhetarëve,
• z. Dritan Tahiri, anëtar i stafit me përkushtim e profesionalizëm të lartë
Takimi u mbyll me përqafime dhe urime të përzemërta.
Z. Dibrani, duke dhuruar libra dhe fjalë zemre, u përshëndet nga stafi i konsullatës deri në oborr, ashtu siç e do zakoni shqiptar. Të gjithë njëzëri i uruan shëndet, jetë të gjatë dhe pension të gëzuar, me bindjen se ai nuk do të ndalet në misionin e tij fisnik përmes shkrimeve dhe ideve të reja.
Ky reportazh nuk mund të mbyllet lehtë, sepse emocionet dhe kujtimet e mbrëmjes ishin të shumta.
Por një gjë është e sigurt:
Shefqet Dibrani mbetet një figurë e jashtëzakonshme e diasporës shqiptare, një njeri që mendoi për Kosovën që në ditët e para të mërgimit, dhe sot, në prag të pensionimit, e sheh ëndrrën e tij të realizuar – shtetin e pavarur të Kosovës me konsullata dhe ambasada të cilat i shërbejnë diasporës dhe respekt të veçant për z. Vigan Berisha, Shef i Misionit Konsullor i Republikës së Kosovës në Cyrih, që po nderon ata që punuan shumë edhe në diasporë për Kosovën.