/ Nga: Dashnim HEBIBI, Bernë /
Një ditë historike për shtetin e Kosovës dhe një faqe e re në historinë e miqësisë së thellë me Zvicrën – Presidentja e Republikës së Kosovës, Vjosa Osmani, me ftesë të Presidentes së Konfederatës së Zvicrës, znj. Karin Keller-Sutter, ndodhet në vizitën e parë shtetërore të një Presidenti të Kosovës në këtë shtet mik.
Në Rezidencën Zyrtare të Këshillit Federal u bë pritja madhështore me nderime të larta shtetërore.
Ku Presidentja Osmani, e shoqëruar nga bashkëshorti i saj Prindon Sadriu, u mirëprit me ngrohtësi nga Presidentja zvicerane Keller-Sutter dhe bashkëshorti i saj, Morten Keller.
Në sheshin qendror të Bernës, Bundesplatz, para një numri të madh të mërgimtarëve, shumë prej tyre të veshur me petka kombëtare dhe me flamuj të Kosovës, të Zvicrës dhe të Dardanisë në duar, ku nuk munguan edhe fëmijë të vegjël mërgimtarë, u mbajt ceremonia shtetërore e mirëseardhjes me nderime ushtarake.
Edhe pse fillimisht kishte rënë shi, në momentin që mbërriti Presidentja Osmani, qielli u hap – sikur edhe natyra vetë e ndjeu gëzimin dhe rëndësinë e këtij momenti. Bashkatdhetarët, të palëkundur, qëndruan aty, të mbushur me emocion e krenari. Edhe publicisti nga Dukagjini e që jeton në Zvicër, Qazim Zejnaj ishte me shumë emocione dhe kishte ardhur enkas për të përcjellur këtë vizitë historike dhe kujtoi ditët e rënda të Kosovës e tash e gjithmonë do ta ruajmë miqësinë me Zvicrën mike sepse na ka hapur dyert kur është dasht dhe ne do ta kemi në zemër, na tha ndër të tjera për medien tonë.
Në mesin e shumë të pranishmëve, aty pranë Parlamentit u takua edhe Ambasadori i Maqedonisë së Veriut në Zvicër, Shkëlqesia e Tij z. Rexhep Demiri, i cili i shoqëruar nga disa miq, shprehu se ka ardhur për të nderuar bashkëkombësit e tij. Ai theksoi marrëdhëniet shumë të mira mes Maqedonisë së Veriut dhe Kosovës dhe theksoi se të dy shtetet do të ecin bashkë drejt integrimit evropian.
Në Parlamentin e Zvicrës, Presidentja Osmani mbajti një fjalim të posaçëm dhe mbresëlënës para përfaqësuesve të institucioneve federale, ku foli për thellimin e bashkëpunimit dypalësh dhe vlerat që bashkojnë Kosovën dhe Zvicrën: lirinë, demokracinë dhe solidaritetin. Ajo vlerësoi lart kontributin e sportistëve shqiptarë, veçanërisht në futboll, si dhe kontributin e çmuar të mërgatës sonë ndër breza për zhvillimin e të dy vendeve.
Në konferencën për media që u mbajt në orët e pasdites, Presidentja Keller-Sutter theksoi rolin dhe integrimin e mrekullueshëm të shqiptarëve në shoqërinë zvicerane dhe vlerësoi miqësinë e sinqertë me shtetin e Kosovës. Presidentja Osmani, nga ana e saj, me qartësi dhe forcë foli për situatën aktuale në Kosovë, për Luginën e Preshevës, për dhunimet seksuale gjatë luftës nga regjimi i Millosheviqit – duke i dënuar me zë të lartë dhe duke thënë se nuk do të dëshironte kurrë të dëgjonte që këto krime të ndodhin në ndonjë shtet tjetër.
Për më shumë sigurisht se jeni të informuar edhe nga mediat zvicerane që kanë dhënë drejpërdrejt, por edhe nga disa video dhe foto që i kemi postuar enkas në FB për lexuesit tanë.
Delegacioni kosovar përfshinte figura të rëndësishme, por ishte edhe Ambasadori i Kosovës në Bernë, Shkëlqesia e Tij Mentor Latifi, si dhe Gjenis Haxhimehmeti, sekretar i ambasadës. Gjeneral brigade Dr. Sefer Isufi, këshilltar ushtarak i Presidentes, gjithashtu u shpreh tejet i lumtur për pritjen dinjitoze nga shteti zviceran.
Në mesin e qytetarëve që ishin të pranishëm në këtë ditë të veçantë ishte edhe Nderim Ibrahimi nga komuna e Dardanës, i cili me emocione për sam24.info tha:
“Sot kujtoj prindërit e mi që protestonin kundër regjimit të Serbisë, dhe pse të mos festoj sot fitoren tonë të madhe – miqësinë e përhershme me Zvicrën.”
Një moment që do të mbetet në kujtesën kolektive ishte pamja prekëse e një punëtori shqiptar, i veshur me rrobat e punës, që e kishte ndalur punën për një çast vetëm që të fotografonte këtë ngjarje të paharrueshme.
Oborri i Parlamentit ishte i mbushur me ushtarë zviceranë, ku për herë të parë flamuri i Kosovës valonte kaq krenar në zemër të Zvicrës – në shtetin ku jetojnë afër 400 mijë shqiptarë.
Programi i vizitës vazhdon në St. Gallen dhe Gjenevë
Në vazhdim të vizitës shtetërore, Presidentja Vjosa Osmani nesër më 22 maj do të vizitojnë qytetin e St. Gallen, ku do të ndalen në qendrën inovative SQUARE të Universitetit të njohur të St. Gallen. Kjo vizitë është pjesë e përkushtimit të përbashkët për bashkëpunim akademik, shkencor dhe ekonomik ndërmjet dy vendeve.
Ndërkohë, në Gjenevë në mbrëmje aty rreth orës 18.30, Presidentja Osmani do të marrë pjesë në një ngjarje të rëndësishme për trashëgiminë politike të Martti Ahtisaarit, të organizuar nga Fondacioni i Paqes Martti Ahtisaari.
Edhe lulet ishin me ngjyrat e shtetit të Kosovës
Misioni i Përhershëm i Finlandës në Gjenevë, organizata ndërkombëtare Interpeace dhe Geneva Graduate Institute dhe me një takim me mërgatën tonë. Kjo ngjarje do të jetë një reflektim i thellë mbi kontributin e Ahtisaarit për paqen në Kosovë dhe më gjerë.
Presidentja do të mbajë një fjalim për rolin e Kosovës si ndërtuese e paqes dhe model për barazi e drejtësi, dhe po ashtu do të zhvillojë një takim të veçantë me mërgatën shqiptare në Gjenevë, për të ndarë me ta momentet e krenarisë dhe sfidat e përbashkëta drejt një të ardhmeje më të ndritur.
Kosova dhe Zvicra – dy shtete, një miqësi që s’ka çmim
Kjo vizitë është më shumë se protokoll:
është shenjë respekti, mirënjohjeje dhe përkushtimi të ndërsjellë. Është dëshmi se edhe kur bie shi – populli që do diellin, e gjen dritën në zemrat e njëri-tjetrit.
Sepse miqësia shqiptaro-zvicerane është e bardhë si bora në Alpe dhe e thellë si kujtimet e gjeneratave që bashkë ndërtuan ura dhe e shtruan rrugën për liri.
Nesër, më 22 maj, do të jemi në Gjenevë ku do të përcjellim nga afër pjesëmarrjen e Presidentes Osmani.
