Festat e nëntorit, Dita e Flamurit, 112 vjetori i pavarësisë së Shqipërisë, datëlindja e legjendarit Adem Jashari nëpër gjithë diasporën tonë po kremtohet në forma të ndryshme. Edhe xhamitë shqiptare në këtë rast në Zvicër, kanë organizuar manifestime të ndryshme dhe po dje në xhamitë shqiptare në tërë Zvicrën në ligjëratën e Xhumasë, të gjithë teologët sipas burimeve tona të helveticALforum.ch që kemi siguruar, kanë folur për 28 Nëntorit, festën më të madhe të kombit, duke u lutur që të jemi më unik mes veti dhe të punojmë sa më shumë për të mirën e kombit dhe të rinjtë tanë, ta kenë më të lehtë të ardhmen dhe duke kujtuar edhe dëshmorët e kombit.
Po dje, konkretisht në xhaminë e Regensdorfit, Imami i kësaj xhamie z. Ferid Ef. Zeqiri ju drejtua jo më pak se një mijë bashkatdhetarëve sa ishin duke pritur të falen në xhami, për të mirën e kombit tonë, paqe dhe për të gjitha të mirat e kësaj bote e duke kujtuar e u lutur edhe për shpirtat e dëshmorëve të bëjnë dritë në përjetësi. Po dje, në xhaminë e Bardhë në Aarburg përveç se kishte festë më 28 nëntor, imami i kësaj xhamie, kryesia dhe anëtarët, janë duke u organizuar edhe me dijetarë të fushave të ndryshme që të mbajnë ligjërata me tema të dobishme për të gjithë. Ashtu siç na njoftoi imami i Xhamisë, z. Nehat V.Ismaili, dje u zhvillua edhe një diskutim me të rinjtë me një temë shumë të mire: “Sjelljet devijuese në moshën e rinisë”.
Në këtë ligjëratë ishte Dr. Miran Sadiku, sociolog me doktoraturë nga Universiteti i Linzit, Austri, mbajti një ligjëratë mbrëmë mbi sjelljet devijuese në moshën e rinisë. Ai shtjelloi në mënyrë të detajuar këtë fenomen kompleks dhe shqetësues, duke nënvizuar disa nga faktorët kryesorë që mund të ndikojnë në sjelljet devijuese, sidomos gjatë periudhës së adoleshencës.
Ndër të tjera, ai theksoi se ndikimet sociale, si marrëdhëniet me shoqërinë, familjen dhe komunitetin e gjerë, janë faktorë kritikë në zhvillimin e sjelljeve devijuese tek adoleshentët. Sipas tij, marrëdhëniet e dobëta me familjen apo shoqërinë mund të çojnë në shfaqjen e këtyre sjelljeve.
Gjithashtu, kërkimi për identitet, faktorët ekonomikë dhe mungesa e mundësive ekonomike mund të ndikojnë në sjelljet devijuese, pasi të rinjtë mund të kërkojnë mënyra të papërshtatshme për të përmbushur nevojat e tyre ekonomike.
Në vijim të diskutimit, me ndërhyrjet dhe sugjerimet e tij, psikologu i shquar në Zvicër, Dr. Ibrahim Sejdini, diskutoi për faktorët psikologjikë që mund të ndikojnë në sjelljet devijuese tek të rinjtë. Ai theksoi se prindërit duhet të jenë të kujdesshëm në ndërveprimin me fëmijët e tyre dhe të përdorin dialog konstruktiv për t’i ndihmuar ata në eliminimin e këtyre shqetësimeve.
Në fillim të ligjërimit, imami i xhamisë, Nehat Ismaili, diskutoi rëndësinë e kësaj teme. Ai theksoi se tema e sjelljeve devijuese në moshën e rinisë është jashtëzakonisht e rëndësishme për prindërit, pasi ka ndikim të drejtpërdrejtë në edukimin dhe mirëqenien e fëmijëve të tyre.
Duke kuptuar arsyet dhe shkaqet e sjelljeve devijuese, prindërit janë në gjendje të krijojnë strategji të efektshme për parandalimin dhe adresimin e këtyre sjelljeve, duke siguruar një mjedis të shëndetshëm dhe mbështetës për zhvillimin e fëmijëve të tyre.
Në emër të kryesisë së Xhamisë së Bardhë, shprehim mirënjohje të thellë për Dr. Miran Sadikun (sociolog) dhe Dr. Ibrahim Sejdinin (psikolog) për trajtimin e kësaj teme të rëndësishme për të rinjtë“. Imami i kësaj xhamie, z. Nehat V.Ismaili, njihet për organizime të tilla dhe gëzon autoritet me plot kuptimin e fjalës jo vetëm në Zvicër. Ai na premtoi, se së shpejti do të ketë edhe ligjërata të tjera, sepse ne i kemi kushtet dhe u jemi mirënjohës kryesisë së xhamisë, anëtarëve, donatorëve e padyshim edhe shtetit mik të kombit tonë siç është Zvicra. Zoti e bekoftë popullin tonë, popullin zviceran, të gjithë miqtë tanë dhe paqe gjtihandej.
helveticALforum.ch