Nga: Dashnim HEBIBI
Regensdorf, 11 korrik – Nuk ishte një e premte e zakonshme kjo në Regensdorf. Teksa vera troket dhe rrugët drejt Kosovës e trojeve shqiptare mbushen me makina, emocione e mall, në xhaminë shqiptare të këtij qyteti të kantonit të Cyrihut u ndje një frymë e veçantë, një dridhje shpirtërore që preku secilin të pranishëm. Mbi 2 mijë besimtarë, që bashkohen për çdo javë, shumica të rinj – studentë, punëtorë, afaristë e profesionistë – u mblodhën edhe sot në faljen e xhumasë jo vetëm për të kryer detyrimin e besimit, por për të marrë dhe përqafime mes vete si vëllezër e lutje për rrugën e pushimeve verore drejt atdheut.
Në këtë ambient ku gjuha shqipe kumbon çdo javë në unitet me fjalën e Zotit, pati një vizitë të veçantë. Shefi i Misionit Konsullor të Republikës së Kosovës në Cyrih, z. Vigan Berisha, një mik i afërt i komunitetit dhe personalitet shumë i dashur në Zvicër, zgjodhi pikërisht këtë vend për të përmbyllur aktivitetin e tij për këtë sezon. I shoqëruar nga z. Visar Robelli, kryetar i Rrjetit të Bizneseve Shqiptare në Zvicrën Qendrore dhe një personalitet i mirënjohur, si dhe PhD Dashnim Hebibi, kjo vizitë ishte një dëshmi tjetër e lidhjes së fortë që diaspora ka me institucionet, besimin dhe kombin. Z.Berisha ndër të tjera për sam24.info tha:
“Në kuadër të angazhimeve tona për forcimin e komunikimit me përfaqësues të komuniteteve fetare shqiptare në Zvicër, patëm kënaqësinë të realizojmë një vizitë në xhaminë shqiptare në Regensdorf, ku u pritëm me mikpritje nga imami, z. Ferit Zeqiri. Gjatë takimit, u zhvillua një bashkëbisedim i hapur dhe i përzemërt mbi rolin e komunitetit shqiptar në ruajtjen e vlerave kombëtare dhe kulturore, si dhe mbi mundësitë për bashkëpunim të mëtejshëm”.
Takimi me imamin e nderuar, mr. hfz. Ferit Zeqiri, ishte i ngrohtë, vëllazëror, me shumë respekt dhe emocione të thella. Z. Zeqiri, i njohur për ligjëratat e tij të fuqishme që prekin jo vetëm besimin por edhe vetëdijen kombëtare, nuk fshehu gëzimin dhe mirënjohjen për këtë vizitë. Ai theksoi se xhamia shqiptare në Regensdorf nuk ka qenë kurrë vetëm vend faljeje, por edhe vatër dijesh, kulture, kombëtarizmi dhe organizimi qytetar.
Në ligjëratën e tij të xhumasë, imami Zeqiri u ndal edhe tek një realitet që shoqëron shumë pushimet verore me përditshmërinë atje, dasmat dhe festat e tjera. “Të investojmë më shumë në dije dhe punësim”, theksoi ai ndër të tjera.
Vizita e z. Berisha, Robelli dhe Hebibi, përfshirë edhe përshëndetjen e tij të ngrohtë, u vlerësua si një akt afërsie e vërtetë. Ai shprehu mirënjohjen e tij për kontributin e vazhdueshëm të kësaj xhamie për komunitetin shqiptar, si para luftës së Kosovës, gjatë dhe pas saj por edhe për edukimin dhe për mesazhet e fuqishme të paqes, bashkëjetesës dhe respektit që jepen çdo ditë e për çdo javë.
Z. Visar Robelli e përgëzoi imamin Zeqiri për organizimin shembullor dhe ligjëratën me mesazhe të thella, ndërsa z. Hebibi theksoi rëndësinë që kjo vatër besimi ka luajtur në përçimin e vlerave të pastra tek shqiptarët në mërgim, dhe premtoi bashkëpunim të mëtejshëm, përfshirë edhe nëpërmjet mediave si herave të tjera dhe institutit shkencor që ai e drejton.
Nga oborri i xhamisë e deri te faltorja, çdo hap dëshmonte përkushtim, pastërti, organizim – një imazh krenar për çdo shqiptar në Zvicër dhe më gjerë. Në përmbyllje të takimit, lutjet që u ngritën për të gjithë shqiptarët që nisen drejt atdheut, për paqe, dashuri dhe kthim të mbarë, ishin kulmi i një dite të paharruar.
Nga Regensdorfi sot u tha me zemër:
Zoti i bekoftë shqiptarët kudo që janë. Udhë të mbarë, pushime të mbara dhe u ktheshim me shëndet e paqe.
Sepse, sado larg të jemi, atdheu na bashkon, feja na fisnikëron, e flamuri na krenon. /SAM24.info