Hiking & Grill në Fricktal – një ditë për natyrë, bashkim dhe kulturë

/ Përgaditi: Dashnim HEBIBI/  Fricktal, 20 prill 2025 – Nën një atmosferë të ngrohtë dhe të mbushur me pozitivitet, u realizua me sukses aktiviteti “Hiking dhe Grill”, i organizuar nga Shoqata Kulturore Shqiptare në Fricktal, në bashkëpunim me Prof. Dr. Ylber Qusaj. Nisja u bë në ora 10:00 nga stacioni hekurudhor në Stein AG, ndërsa itinerari përshkoi një rrugë piktoreske përgjatë lumit Rhein deri në Mumpfer Fluh, duke ofruar pamje mbresëlënëse dhe një përvojë të veçantë për të gjithë pjesëmarrësit.

Gjatë ecjes mbizotëroi një atmosferë dinamike dhe e këndshme, me humor, biseda miqësore dhe shumë momente të bukura që u përjetësuan në fotografi dhe kujtime të paharrueshme. Në fund të itinerarit, pjesëmarrësit u mirëpritën me një grill të përgatitur me përkushtim nga Shoqata, duke krijuar një hapësirë relaksuese për bashkëbisedim, njohje të reja dhe forcim të lidhjeve komunitare. Në fjalën e tij përshëndetëse, Kryetari i Shoqatës, Prof. Dr. Ylber Qusaj, theksoi rëndësinë e afrimit të komunitetit shqiptar në rajonin e Fricktalit dhe nevojën për të ruajtur dhe kultivuar vlerat kulturore kombëtare në funksion të një integrimi të denjë në shoqërinë zvicerane. Ai shprehu mirënjohje për themeluesit e Shoqatës, duke veçuar me falënderim Rafet Ademin dhe familjen Ibrahimi për përkushtimin dhe kontributin e tyre të palodhur në ndërtimin dhe zhvillimin e saj. Sekretari i Shoqatës, z. Gafurr Ahmeti, dhe zëvendëssekretari, z. Nderim Ibrahimi, prezantuan një përmbledhje të historikut dhe vizionit të Shoqatës. Ata theksuan se themelimi i këtij organizimi ka ardhur si një përgjigje konkrete ndaj nevojave të komunitetit shqiptar në mërgim, me qëllim ndërtimin e një rrjeti të fuqishëm, solidar dhe të angazhuar në rajonin e Fricktalit.

Ndërkohë, ish-kryetari Rafet Ademi, figurë e njohur në fushën e sportit, shprehu kënaqësinë e tij për organizimin, ndërsa veprimtari i njohur i mërgatës, z. Nderim Ibrahimi, vlerësoi rëndësinë e këtyre nismave për forcimin e identitetit dhe bashkëpunimit brenda komunitetit. “Organizime të tilla na ndihmojnë të çlirohemi nga energjitë negative dhe të mbushemi me pozitivitet,” u shpreh Prof. Dr. Ylber Qusaj. Ai shtoi se aktiviteti nisi me një grup prej 25 pjesëmarrësish, përfshirë fëmijë dhe persona të moshave të ndryshme, duke theksuar se qëllimi afatgjatë është motivimi i brezit të ri dhe rritja e përfshirjes së komunitetit në të ardhmen. “Jemi në Zvicër dhe kemi të gjitha mundësitë për të ndërtuar një komunitet të fortë, të organizuar dhe të bashkuar,” theksoi ai.

Ky aktivitet dëshmon se përmes bashkëpunimit, respektit dhe përkushtimit të përbashkët, komuniteti shqiptar në Zvicër mund të ndërtojë ura të forta ndërmjet brezave dhe kulturave, duke ruajtur identitetin dhe kontribuar aktivisht në shoqërinë ku jeton. #ShoqataShqiptareFricktal #Hiking2025 #KulturaShqiptare #Bashkë #RrënjëtDheIntegrimi