Me rastin e 400-vjetorit të lindjes së figurës së shquar të kulturës dhe historisë shqiptare, Imzot Pjetër Bogdani, Misioni Katolik Shqiptar në Luzern dhe Shoqata Humanitare “Nënë Tereza” organizojnë një mbrëmje kulturore përkujtimore me datë 22 nëntor 2025 në ambientet e Centro Papa Giovanni, në adresën Seetalstrasse 16, 6020 Emmen, duke filluar nga ora 18:00.
Kjo ngjarje, që vjen në kuadër të edicionit të tretë të serisë “Gjurmëve të rrënjëve tona”, synon të sjellë në vëmendje figurën e ndritur të Pjetër Bogdanit – klerik, dijetar dhe një ndër mendjet më të ndritura të kombit shqiptar.
Programi i pasur i mbrëmjes do të moderohet nga znj. Besiana Qani Mehmeti, dhe do të përfshijë fjalime nga personalitete të njohura si z. Nue Zalli, kryetar i Shoqatës Humanitare “Nënë Tereza” në Zvicër dhe Prof. Dr. Elena Kocaqi, e cila do të mbajë kumtesën “Imzot Pjetër Bogdani në 400-vjetorin e lindjes”.
Në kuadër të këtij aktiviteti, do të ketë interpretime muzikore nga Shkodran Tolaj, Besiana Qani Mehmeti, dhe pianistes Ermira Lefort, si dhe valle tradicionale shqiptare nga ansambli “Shqiponja”. Po ashtu, do të mbahet një ligjëratë nga Pater Ndue Kajtazi mbi temën “Çeta e Profetëve – vlera e saj kombëtare dhe shpirtërore”.
Ngjarja do të përmbyllet me fjalën përshëndetëse të Dr. Don Anton Uka, udhëheqës i Misionit Katolik Shqiptar në Luzern.
Pas programit zyrtar, të pranishmit do të kenë mundësinë të shijojnë një ekspozitë pikturash, tavolina me libra, si dhe një aperitiv shoqëruar me muzikë tradicionale shqipe nën interpretimin e këngëtarëve dhe instrumentistit Gezim Demaj. /SAM24.info
Përgaditi: D.H