Pas barazimit të Zvicrës ndaj Sllovenisë dhe fitores së Kosovës kundër Suedisë, rruga drejt Kupës së Botës po merr një ngjyrë dramatike dhe emocionuese, me një skenar që mund të vendoset në nëntor, madje edhe në një finale të mundshme në Prishtinë.
Barazimi pa gola i Zvicrës ndaj Sllovenisë ka komplikuar situatën për ekipin “helvetik”, ndërsa Kosova, me fitoren 1-0 në Goteborg ndaj Suedisë, ka treguar se mund të rivalizojë fuqishëm për vendet e kualifikimit, shkruan mediat zvicerane.
Skenari më i mundshëm është ky: nëse Zvicra nuk arrin të fitojë ndeshjen e parafundit në shtëpi kundër Suedisë më 15 nëntor dhe Kosova arrin një fitore jashtë fushe kundër Sllovenisë, atëherë gjithçka mund të vendoset tri ditë më vonë në stadiumin “Fadil Vokrri” në Prishtinë. Kjo do të ishte një finale dramatike, ku skuadrat do të luftonin për një vend të çmuar në Kupën e Botës.
Reagimi i përzgjedhësit Yakin
Përzgjedhësi i Zvicrës, Murat Yakin, e pranon forcën e Kosovës, por refuzon të tregojë frikë, nëse gjithçka vendoset në ndeshjen e fundit.
“Ne i njohim lojtarët e Kosovës dhe e dimë potencialin e tyre, por nuk kemi frikë nga asnjë kundërshtar. Do të luftojmë me gjithë forcën tonë për të siguruar kualifikimin”, deklaroi ai.
Yakin thekson gjithashtu se performanca e Kosovës në shtëpi është e jashtëzakonshme, pasi skuadra nuk ka humbur për më shumë se një vit në stadiumin e saj, duke krijuar një atmosferë të fortë dhe sfiduese për çdo kundërshtar.
Lojtarët e vetëdijshëm për sfidën, Xhaka thotë se e kanë në dorë
Lojtarët zviceranë janë të vetëdijshëm për energjinë dhe motivimin që sjell mbështetja e tifozëve kosovarë, veçanërisht në një ndeshje të vendosur në Prishtinë. Mes tyre është edhe mesfushori Remo Freuler, i cili shprehet se do të ishte mirë që ta mbyllnin para ndeshjes së fundit.
“Do të ishte mirë nëse kualifikimi do të ishte i vendosur para udhëtimit tonë për në Prishtinë, por gjithsesi duhet të fokusohemi për të fituar ndeshjen ndaj Suedisë dhe të mos e lëmë rastin në dorë të fatit”, ka thënë Freuler.
Edhe kapiteni Granit Xhaka është realist, duke deklaruar se Zvicra e ka në dorë situatën.
“Duhet të ndodhin shumë gjëra që të sigurojmë kualifikimin. Ne kemi shumë cilësi në ekip, por e vetmja mënyrë për të arritur sukses është që të mos e mposhtim vetveten. Duhet të japim 100% në çdo ndeshje dhe të përqendrohemi maksimalisht”, deklaroi mesfushori shqiptar.
Një finale e mundshme në Prishtinë
Në të vërtetë, këto ndeshje të fundit janë më shumë se vetëm një përballje për tri pikët; ato janë një provë e karakterit, strategjisë dhe durimit të skuadrave.
Stadiumi “Fadil Vokrri” në Prishtinë pritet të jetë një arenë e zjarrtë ku Kosova do të kërkojë të vendosë fitoren historike dhe të tregojë se mund të konkurrojë me skuadrat më të forta të Evropës.
Çdo gol, çdo ndërhyrje dhe çdo moment do të ketë peshën e tij në vendimin për kualifikimin për në Kupën e Botës, transmeton telegrafi.