Nga Dashnim HEBIBI, Gjenevë
Një javë e mbushur me frymë bashkëpunimi dhe dialog ndërkombëtar u zhvillua në Zvicër gjatë Javës së Paqes në Gjenevë, ku personalitete të njohura nga vende të ndryshme u bashkuan për të diskutuar mbi rolin e grave dhe të rinjve në ndërtimin e paqes.
Në mesin e tyre ishte edhe Zonja Ejona Icka, një personalitet i njohur jo vetëm në trojet shqiptare, por edhe në arenën ndërkombëtare, e cila ka kontribuar dhe po kontribuon me përkushtim për të mirën e përbashkët.
Si Koordinatore e OKB-së për IAYSP Europe & Middle East, zonja Icka ishte një nga panelistet e nderuara në eventin “No Peace without Women – No more War, Can we?”, që u mbajt më 16 tetor 2025 në Zyrat e Kombeve të Bashkuara në Gjenevë.
Ky aktivitet u organizua nga Women’s Federation for World Peace International (WFWPI) dhe Universal Peace Federation (UPF), duke mbledhur figura të shquara nga fusha të ndryshme për të diskutuar mbi rëndësinë e përfshirjes, mirëkuptimit dhe bashkëpunimit si themel i paqes së qëndrueshme.
Në fjalën e saj, zonja Icka theksoi rëndësinë e dialogut dhe rolit të grave dhe të rinjve në ndërtimin e një bote më të drejtë dhe më të paqtë. Ajo shprehu gjithashtu mirënjohjen për Carolyn Handschin dhe Heiner Handschin për organizimin e një eventi të frytshëm e inspirues.
“Ky takim nuk ishte vetëm një reflektim mbi rolin e grave dhe të rinjve në proceset e paqes, por edhe një kontribut i vërtetë për paqen,” u shpreh ajo.
Pjesëmarrja e zonjës Ejona Icka në këtë forum ndërkombëtar dëshmon edhe një herë përkushtimin e saj të palëkundur ndaj vlerave të paqes, barazisë dhe zhvillimit të qëndrueshëm global. /SAM24.info