/ Nga: Dashnim HEBIBI, Bernë /
Nga zëri i protestave dikur, tek përqafimi i miqësisë shtetërore sot – mërgata shqiptare në Zvicër nderon vizitën e parë shtetërore të Presidentes Vjosa Osmani
Erdhi dita e shumëpritur – më 21 maj 2025, Presidentja e Republikës së Kosovës, Vjosa Osmani, do të zhvillojë vizitën e parë shtetërore në Zvicër, me ftesë të Presidentes së Konfederatës, znj. Karin Keller-Sutter. Një vizitë me karakter historik e simbolik, që ngërthen në vete jo vetëm marrëdhëniet diplomatike të shkëlqyera mes dy shteteve, por edhe përkushtimin e jashtëzakonshëm të mërgatës shqiptare, brez pas brezi, për Kosovën.
Dikur, qyteti i Bernës ishte skena e protestave të fuqishme të mërgatës shqiptare kundër regjimit të Serbisë, duke ngritur zërin për të drejtat e një populli të shtypur në tokën e vet. Zëri i diasporës në këtë vend mik të shqiptarëve ishte i vendosur, i qartë dhe i guximshëm – dhe bota e dëgjoi. Pikërisht nga ky zë, më 24 mars 1999, nisi ndërhyrja ndërkombëtare që i dha fund gjenocidit në Kosovë. Dhe kjo nuk harrohet.
Sot, mbi 400 mijë shqiptarë jetojnë e veprojnë në Zvicër – një komunitet i integruar, i respektuar dhe i përfaqësuar në nivel kantonal dhe kombëtar. Ata janë shtylla e marrëdhënieve të shkëlqyera Kosovë–Zvicër, duke dëshmuar çdo ditë se atdheu i dytë nuk është vetëm vend pune, por edhe vend zemre. Nga gjenerata e parë e sakrificës, deri tek gjenerata e katërt e integrimit, mërgata shqiptare është histori suksesi.
Ceremonia zyrtare dhe entuziazmi
Presidentja Osmani do të pritet me ceremoni shtetërore dhe nderime të larta ushtarake në sheshin Bundesplatz të Bernës, më 21 maj, në praninë e qytetarëve dhe të përfaqësuesve të lartë institucionalë të Zvicrës. Në kuadër të vizitës, ajo do të zhvillojë takime me Presidenten Keller-Sutter, me Këshillin Federal, dhe do të mbajë një fjalim historik në Parlamentin e Zvicrës. Dy presidentet do të mbajnë gjithashtu një konferencë të përbashkët për mediat dhe një banket shtetëror në nder të delegacionit nga Kosova – një tjetër simbol i miqësisë së fortë mes dy popujve. Në ditën e dytë të vizitës, Presidentja Osmani do të vizitojë një ndërmarrje prodhuese në pjesën lindore të Zvicrës dhe një qendër kërkimore të Universitetit Saint Gallen. Po ashtu, në Gjenevë, ajo do të takohet me pjesëtarë të komunitetit shqiptar, duke forcuar më tej lidhjen me diasporën.Shi simbolik, por zemra e diellshme
Edhe pse sipas parashikimeve meteorologjike dita e vizitës pritet të jetë me shi, shumë bashkatdhetarë janë nisur drejt Bernës, të vendosur që t’i japin mbështetje Presidentes Osmani dhe të tregojnë se Kosova nuk është vetëm një vend, por një ndjenjë që nuk shuhet as nga largësia, as nga koha. Disa prej tyre kanë marrë pushim nga puna, duke dëshmuar përkushtimin e tyre ndaj vendlindjes. “Ndoshta jo rastësisht po bie shi – është edhe një metaforë e lotëve të gëzimit të kësaj mërgate që ka dhënë gjithçka për Kosovën,” thotë Burhani nga Dardana për redaksinë tonë.Mirënjohje për Zvicrën dhe popullin e saj
Mërgata shqiptare në Zvicër ka kontribuar jo vetëm për Kosovën, por edhe për zhvillimin e Zvicrës. Kjo vizitë është një mundësi për të falënderuar shtetin mik për mbështetjen e vazhdueshme dhe për të thelluar bashkëpunimin në fusha si ekonomia, arsimi dhe shkëmbimet kulturore. Raportet bilaterale janë të shkëlqyera dhe gjithnjë në rritje. Zvicra, që dikur priti refugjatët e luftës dhe dëgjoi zërin e tyre, sot i hap dyert një lidereje shtetërore të një Kosove të pavarur e demokratike. Për më shumë informacione, SAM24.info do të ju mbajë të informuar gjatë gjithë ditës me raportime të drejtpërdrejta, foto dhe materiale ekskluzive. Redaksia jonë është e akredituar për të përcjellë këtë ngjarje historike. Ta ruajmë këtë miqësi të përjetshme me Zvicrën – sepse historia po shkruhet, dhe jemi pjesë e saj. SAM24.info