Nga 1 shtatori 2025, në të gjithë vendet e Bashkimit Evropian dhe në Zvicër hyn në fuqi ndalimi i përdorimit dhe tregtimit të produkteve për thonj që përmbajnë substancën TPO (Trimethylbenzoyl Diphenylphosphine Oxide). Ky vendim është pjesë e rregullores së re të BE-së për produktet kozmetike, e cila synon të mbrojë shëndetin e konsumatorëve dhe punonjësve të industrisë estetike.
TPO është një substancë e përdorur gjerësisht në produktet xhel dhe llak për thonj, pasi ndihmon në procesin e ngurtësimit të tyre me dritë UV apo LED. Megjithatë, sipas vlerësimeve të fundit shkencore dhe vendimeve të Komisionit Evropian, TPO është klasifikuar si një substancë CMR e kategorisë 1B, që do të thotë se mund të jetë kancerogjene, mutagjene dhe toksike për riprodhimin.
Vendimi për ndalimin e TPO është përfshirë në Rregulloren (EU) 2025/877, të publikuar më 12 maj 2025, dhe tashmë do të zbatohet në të gjitha vendet e Zonës Ekonomike Evropiane, përfshirë edhe Zvicrën. Që nga data 1 Shtator, asnjë produkt që përmban TPO nuk lejohet të importohet, tregtohet apo të përdoret, qoftë në ambiente profesionale të bukurisë, qoftë nga përdorues të zakonshëm në shtëpi.
Autoritetet evropiane të shëndetit publik kanë theksuar se ky ndalim është i menjëhershëm dhe nuk ka periudhë transitore, çka do të thotë se të gjitha produktet ekzistuese në treg që përmbajnë TPO duhet të hiqen dhe nuk mund të përdoren më pas kësaj date. Përdorimi i tyre do të konsiderohet shkelje e ligjit të kozmetikës.
Ndërkohë, shumë kompani kozmetike kanë filluar të ofrojnë produkte alternative pa TPO, duke përdorur përbërës më të sigurt, si TPO-L ose kombinime të tjera photoinitiatorësh të miratuar nga BE. Profesionistët e fushës së bukurisë janë këshilluar të kontrollojnë përmbajtjen e produkteve të tyre ekzistuese dhe të kontaktojnë me furnitorët për të siguruar zëvendësime të sigurta dhe të ligjshme.
Ndalimi është pjesë e përpjekjeve të vazhdueshme të BE-së për të garantuar një treg më të sigurt për produktet kozmetike dhe për të ulur rreziqet që vijnë nga substancat e dëmshme kimike.
Çfarë duhet të bëjnë profesionistët e thonjve?
-Të verifikojnë përbërjen e produkteve të tyre.
-Të ndalojnë përdorimin e çdo llaku apo xheli që përmban TPO.
-Të heqin produktet e papërshtatshme nga ambientet e punës përpara 1 shtatorit.
-Të informojnë klientët për këtë ndryshim dhe të përdorin alternativa të aprovuara.
Ky ndryshim shënon një hap të rëndësishëm drejt mbrojtjes së shëndetit të konsumatorëve dhe profesionistëve në sektorin e bukurisë. Ndonëse do të kërkojë përshtatje në praktikë, përfitimet afatgjata në sigurinë dhe cilësinë e produkteve janë të pamohueshme, transmeton psikologjia.